Almatyda jasóspirim balany jerge laqtyryp jibergen: ombýdsmen tergeý týraly aıtty
ALMATY. KAZINFORM — Almaty boıynsha bala quqyqtary jónindegi ýákil Dıana Erlan Áýezov aýdanynda bolǵan oqıǵaǵa qatysty málimdeme jasady.
Onyń aıtýynsha, zardap shekken eki jasar balaǵa medıtsınalyq kómek kórsetilgen, ári qaraı da tolyqqandy ońaltýdan ótedi. Qazir ol ata-anasynyń janynda úıinde.
– 13 jastaǵy bala da ata-anasynyń janynda. Biz balalardyń otbasymen baılanystamyz. Almatynyń Psıhologııalyq qoldaý ortalyǵynda psıhologııalyq kómek usynyldy, - dedi Dıana Erlan.
Sonymen qatar ol balalardyń fotosyn zańdy ókilderiniń kelisiminsiz taratpaýǵa úndedi.
Atalǵan is QR Qylmystyq kodeksiniń 107-baby 2-bólimi 8-tarmaǵy boıynsha tirkelgen.
Eske salaıyq, buǵan deıin Almatyda jasóspirim eki jasar balany kóterip, jerge laqtyryp jibergenin habarlaǵan edik. Búldirshin jaraqat alǵan.
Atalǵan derek boıynsha Áýezov aýdandyq polıtsııa basqarmasy qylmystyq is qozǵady.