Almatylyq jasóspirim 5,6 mlrd teńge tsıfrlyq aktıvterdi zańsyz aınaldyrǵan

ASTANA. KAZINFORM – Qarjylyq monıtorıng agenttiginiń Almaty qalasy boıynsha departamenti tıisti ruqsat qujattarynsyz tsıfrlyq aktıvterdiń zańsyz aınalymyna qatysty istiń tergeýin aıaqtady.

крипто
Коллаж: Kazinform

Agenttiktiń baspasóz qyzmetiniń habarlaýynsha, 2020 jyly qyrkúıekte, kámelettik jasqa tolmaǵan kúdikti «Telegram» messendjeri men «OLX» platformasynda aıyrbastaý operatsııalaryn júrgizetini týraly habarlandyrýlar ornalastyrǵan.

«Binance» krıptobırjanyń paıdalanýshylary tek eresekter bola alatyndyqtan, ol akkaýnt jasaý úshin aǵasyna verıfıkatsııadan ótýin suraǵan.

2021 jyly ol aınalym somalaryn bólshekteý jáne buǵattaý táýekelin tómendetý úshin óziniń týystarynyń atyna qosymsha taǵy úsh akkaýnt tirkegen.

Sóıtip 2021-2024 jyldar aralyǵynda jalpy somasy 5,6 mıllıard teńge tsıfrlyq aktıvterdiń zańsyz aınalymyn uıymdastyrǵan.

Kórsetken qyzmeti úshin alynǵan syıaqy mólsheri - 0,5%-dan 2,5%-ǵa deıin.

Kúdikti óziniń zańsyz tabysyna Mitsubishi avtokóligin satyp alǵan.

Sot úkimimen ol QR QK 214-babynyń 2-bóligi 2-tarmaǵy boıynsha (zańsyz kásipkerlik, asa iri mólsherde tabys alýmen ushtasqan) kináli dep tanylyp, 2,5 jylǵa erkindigin shekteý jazasyna kesilgen.

Sondaı-aq, memleket kirisine 5 172 USDT tsıfrlyq aktıvteri men Mitsubishi avtokóligi tárkilendi.

Atap ótý kerek, zańsyz krıpto aıyrbastaý oryndary óz klıentterin sáıkestendirmeıdi jáne kúdikti operatsııalardy anyqtamaıdy. Sondyqtan, olardyń qyzmetterin kóbine kıberalaıaqtar men esirtki zattaryn ótkizýshiler paıdalanady.

- Eske salaıyq, 2024 jyly jalpy aınalymy 60 mlrd teńge bolatyn 36 zańsyz krıpto aıyrbastaý pýnkti joıyldy. 4,8 mln USDT (shamamen 2,5 mlrd teńge) somasyna aktıvter buǵattalyp, tárkilengen. Qazaqstan Respýblıkasynyń «Tsıfrlyq aktıvter týraly» Zańyna sáıkes eldegi tsıfrlyq aktıvterdiń aınalymyna qatysty kez kelgen qyzmet lıtsenzııany qajet etedi, - delingen habarlamada.

Osyǵan deıin «Asar Baspana» qarjy pıramıdasynyń 86 myńnan astam azamattan 12,4 mlrd teńge tartqany týraly jazdyq.

Сейчас читают