Almatyda jasandy ıntellektini jetik biletin oqýshylar arasynda olımpıada ótti

ALMATY. KAZINFORM - Qazaqstan boıynsha alǵash ret jasandy ıntellektini jetik meńgergender oqýshylar arasynda olımpıada «Respýblıkalyq fızıka-matematıka mektebiniń» Almaty qalasyndaǵy fılıalynda uıymdastyryldy.

Olımpıadanyń alǵashqy irikteý kezeńi 10-qarasha kúni onlaın formatta ótti. Oǵan 8-12 synyp oqýshylarynan quralǵan 450 komanda qatysty. Baq synaǵandar arasynda Belarýs jáne Qyrǵyzstan komandalary da bar.

Іrikteýden súrinbeı ótken 52 komanda Almatydaǵy fızmat mektebine jınaldy. Astana, Almaty jáne Aqtóbe, Aıagóz, Qaraǵandy, Qyzylorda, Taldyqorǵan, Shymkent qalalarymen, Túrkistan oblysynan kelgen komandalarǵa elimizdiń jetekshi sarapshylary qurastyrǵan 6 eseptiń sheshimin tabý úshin 4 saǵat berildi. Qatysýshylar óz mashınalyq oqytý modelderin jasap, sheshimderin «Fızmat» muǵalimderi arnaıy daıyndaǵan baǵdarlamamen tekserdi.

Olımpıadanyń qorytyndysy boıynsha júldeli birinshi oryndy Astana qalasyndaǵy fızıka-matematıka baǵytynda bilim beretin Nazarbaev zııatkerlik mektebiniń «Ziatech» komandasy jeńip aldy.

- Otandyq oqýshylardyń jasandy ıntellekt salasyndaǵy jetistikterin qoldap, odan ári jetildirý úshin atalǵan olımpıadany halyqaralyq deńgeıge jetkizgen jón, - deıdi olımpıada uıymdastyrýshylary.

Eske salaıyq, buǵan deıin jasandy ıntellekt qarjyny qalaı basqaratynyn jazǵanbyz.