Almatyda jasandy ıntellekt olımpıadasynyń jeńimpazdary anyqtaldy
ASTANA. KAZINFORM — Almaty qalasynda FAIO 2026 (Fizmat AI Olympiad) halyqaralyq jasandy ıntellekt jáne mashınalyq oqytý olımpıadasy aıaqtalyp, jeńimpazdar men júldegerler marapattaldy. Halyqaralyq bilim saıysyn «Respýblıkalyq fızıka-matematıka mektebi» KeAQ SDU University bazasynda uıymdastyrdy.
Bıyl olımpıadanyń irikteý kezeńine álemniń 28 elindegi 125-ten astam qaladan shamamen 1 500 mektep oqýshysy qatysty. Іrikteý nátıjesinde 49 komanda fınalǵa joldama alyp, olardyń 47-si sheshýshi kezeńde baq synady. Fınalǵa 15 elden 118 oqýshy qatysty.
Halyqaralyq jarysta Qazaqstan, Armenııa, Belarýs, Ispanııa, Italııa, Kıpr, Qyrǵyzstan, Marokko, Mońǵolııa, Reseı, Rýmynııa, Tájikstan, Taıland, Túrikmenstan jáne Fılıppın elderiniń oqýshylary óz bilimderi men qabiletterin kórsetti.
Olımpıada komandalyq formatta ótkizilip, qatysýshylar baǵdarlamalaý, derekterdi taldaý, matematıka jáne mashınalyq oqytý baǵyttary boıynsha kúrdeli tapsyrmalardy oryndady. Fınaldyq kezeń eki týrdan turdy.
Jarys qorytyndysy boıynsha Gran-prı Reseı komandasyna buıyrdy. I oryndy Reseıdiń 3 komandasy, II oryndy Qazaqstan, Reseı, Taıland jáne Kıpr elderiniń 8 komandasy, III oryndy Qazaqstan, Rýmynııa, Reseı, Ispanııa jáne Mońǵolııa elderiniń 12 komandasy ıelendi. Olımpıadanyń jalpy júlde qory 11 mıllıon teńgeni qurady.
FAIO olımpıadasy bıyl úshinshi ret uıymdastyryldy. 2024 jyly tek qazaqstandyq oqýshylar qatysqan bilim saıysy búginde halyqaralyq deńgeıge kóterildi. Bul jarys jas daryndardyń jasandy ıntellekt pen mashınalyq oqytý salasyndaǵy bilimin jetildirýge, tájirıbe almasýyna jáne zamanaýı tehnologııalarǵa degen qyzyǵýshylyǵyn arttyrýǵa múmkindik beredi.
Halyqaralyq olımpıadanyń ótýine birqatar iri tehnologııalyq, qarjylyq jáne bilim berý uıymdary qoldaý kórsetti. Atap aıtqanda, activ 5G telekommýnıkatsııalyq seriktes, Freedom Holding Corp. tehnologııalyq seriktes, ANSA Qory ınnovatsııalar jónindegi seriktes, Halyk ımpakt-seriktes retinde qatysty. Sonymen qatar Mastercard, investbanq, MA7 Ventures, Silkroad Innovation Hub jáne Marine Health uıymdary jobany qoldady.
Osyndaı halyqaralyq zııatkerlik jarystardy Qazaqstanda ótkizý elimizdiń bilim berý áleýetin tanytýǵa, daryndy oqýshylardy qoldaýǵa jáne jasandy ıntellekt salasyndaǵy halyqaralyq yntymaqtastyqty damytýǵa yqpal etedi.
