Almatyda jas jigit 20-qabattan qulap, qaza tapty

Almatyda jas jigit joǵary qabattan qulap, mert boldy. Polıtsııa sýıtsıd babymen tergeýdi bastady, dep habarlaıdy Kazinform. 

Oqıǵa ornynda túsirilgen vıdeo áleýmettik jelide tarady. Onda qaıǵyly jaǵdaı 19 qarasha kúni tańǵy ýaqytta «Komfort Sıtı» turǵyn úı kesheninde bolǵany aıtylǵan.

Almaty qalalyq Polıtsııa departamentiniń baspasóz qyzmeti atalǵan aqparatty rastady. 2001 jyly týǵan jigit turǵyn úı kesheniniń 20-qabatynan qulap ketken.

«Bul is boıynsha Bostandyq aýdandyq polıtsııa basqarmasy QR Qylmystyq kodeksiniń 105-babymen («Ózin-ózi óltirýge deıin jetkizý») sotqa deıingi tergeýdi bastady. Oqıǵanyń basqa da mán-jaıy anyqtalyp jatyr», – dep habarlady Almaty qalalyq Polıtsııa departamentinen.