Almatyda jas jigit kópqabatty úıden sekirip ketti

ALMATY. KAZINFORM — Almatyda jas jigit kópqabatty úıden sekirip ketti. Bul aqparatty Almaty qalasynyń Polıtsııa departamenti rastady.

Jelidegi málimet boıynsha, 18 jastaǵy jigit Áýezov aýdanyndaǵy kópqabatty úıden sekirip, sýıtsıd jasaǵan.

— Osy derek boıynsha Áýezov aýdandyq PB qylmystyq is qozǵady. Oqıǵanyń sebebi men mán-jaıy anyqtalyp jatyr, — dep habarlady Almaty qalasy PD baspasóz qyzmeti.

Aıta ketken jón, buǵan deıin áleýmettik jeli qoldanýshylary balalardy sýıtsıdke ıtermeleıtin oıyndardyń áseri bolýy múmkin ekenin aıtyp, dabyl qaqqan bolatyn.

Ata-analar bir-birine balasynyń telefonyn tekserýge keńes berip, qaýipti oıyndardyń tizimin jasap jatyr. Óıtkeni balalar áldebir oıyndarda berilgen tapsyrmaǵa erip, ata-anasynan, muǵalimderden, janyna jaqyn adamdardan bezinip jatqan bolýy yqtımal.

Áleýmettik jelide Asar-Ume qaıyrymdylyq qorynyń negizin salýshylardyń biri, tanymal bloger Ashat Nurmashev osyndaı oıyndardyń qaýpi týraly pikir bildirdi.

— Bul birinshi ret emes. Ótken jyly tanystarymnyń 12-13 jasar balasy sekirip ketti. Oıyndardyń áseri týraly aıtyldy. Áli kúnge deıin kóbimiz olardyń balalarǵa qandaı yqpalyn tıgizetinin túsinbeımiz — dep jazady bloger.

Eske salaıyq, buǵan deıin 19 jastaǵy jigit Almatydaǵy Dostyq dańǵylyndaǵy kópqabatty úıden sekirip ketkenin jazǵanbyz. 

Sondaı-aq ótken aptada Almatyda kópqabatty úıden qulaǵan eki jasóspirim kóz jumdy.