Almatyda jas ofıtserlerdiń oqýdy aıaqtaý rásimi ótti
ASTANA. KAZINFORM — 28 gavardııalyq-panfılovshylar saıabaǵynda Qorǵanys mınıstrligi Radıoelektronıka jáne baılanys áskerı-ınjenerlik ınstıtýty kýrsanttarynyń 24-shi legi oqýdy támamdady.
«Leıtenant» alǵashqy ofıtserlik ataǵyn alǵan túlekterdiń tórteýi joǵary oqý ornyn úzdik bitirdi. Sonymen birge Ujymdyq qaýipsizdik týraly shart uıymynyń áskerı kadrlaryn daıarlaý sheńberinde Qyrǵyzstannyń bir azamaty oqýdan ótti.
Іs-sharaǵa Qorǵanys mınıstrliginiń, Áýe qorǵanysy kúshteriniń, áskerı jáne azamattyq joǵary oqý oryndarynyń ókilderi, Qarýly kúshterdiń ardagerleri, oqýdy aıaqtaǵan túlekterdiń týystary men jaqyndary qatysty.
Jas ofıtserlerdi Qorǵanys mınıstriniń orynbasary — Áýe qorǵanysy kúshteriniń bas qolbasshysy general-maıor Qaırat Sadyqov quttyqtady. Ol aldaǵy kúnderi áskerlerde qyzmetke kirisetin joǵary bilikti mamandardy daıarlaǵany úshin ınstıtýt basshylyǵy men oqytýshylar quramyna alǵysyn bildirdi.
— Oqýdy aıaqtaǵannan keıin sizder qajyrly qyzmet pen kásibı ósý úshin barlyq múmkindikterge ıe boldyńyzdar. Eń bastysy — ınstıtýt qabyrǵasynda zamanaýı bilimdi ıgerip, sapaly áskerı daıyndyqtan óttińizder, — dep atap ótti ol.
Bıyl ınstıtýtty eki kýrs bir ýaqytta aıaqtap otyr. Óıtkeni oqý orny tórt jyldyq oqytý júıesine kóshken bolatyn.
— Bul shyǵarylym bizge, besinshi kýrs kýrsanttary úshin, tarıhı boldy. Biz bes jyldyq baǵdarlamanyń sońǵy shyǵarylymymyz. Sonymen qatar, oqý úzdigi retinde men Prezıdent — Joǵarǵy Bas qolbasshynyń qolynan leıtenant pogonyn aldym. Endi ınstıtýtta alǵan bilimimdi Otan qorǵaý isine arnaımyn, — dedi leıtenant Danıal Darqulov.
Dástúr boıynsha is-shara ınstıtýttyń Jaýyngerlik týymen qoshtasý rásimimen aıaqtaldy. Áskerı orkestrdiń únimen jas leıtenanttar saltanatty sherýmen júrip ótti.
Áskerı oqý orny radıoelektronıka, radıotehnıka jáne ınjınırıng, avtomattandyrý jáne ınfokommýnıkatsııalyq tehnologııalar, aqparattyq qaýipsizdik júıeleri, áskerı jýrnalıstıka, áskerı dırıjerleý jáne áskerı qurylys sııaqty baǵyttar boıynsha bilikti áskerı mamandardy daıarlaýdy júzege asyrady. Osy ýaqytqa deıin Radıoelektronıka jáne baılanys áskerı-ınjenerlik ınstıtýty 4000-nan astam ofıtser daıyndady.
Instıtýt túlekteri tsıfrlandyrý jáne zamanaýı áskerı tehnologııalardy qoldaný jaǵdaıynda tıimdi áreket etýge daıyn. Olar barlyq áskerı qurylymdarda suranysqa ıe.
Bıylǵy jyldan bastap ınstıtýtta «Áskerı istegi krıptologııa», «Halyqaralyq áskerı qatynastar jáne aýdarma isi» atty taǵy eki jańa mamandyq ashyldy. Olardyń basty artyqshylyǵy bakalavr akademııalyq dárejesin bere otyryp, áskerı jáne azamattyq dıplom alý múmkindigi.
Aıta ketelik Aqtóbe garnızony «Aıbyn» halyqaralyq jastar jıynyna qatysýshylardy qabyldaýǵa daıyn ekenin jazǵan edik.