Almatyda jas qyzǵa kúsh kórsetken kýrsant ІІM akademııasynan shyǵaryldy

ALMATY. KAZINFORM — Almatyda ІІM akademııasynyń kýrsanty kámeletke tolmaǵan qyzǵa kúsh kórsetti degen kúdikke ilindi.

Bul týraly jábirlenýshiniń ápkesi áleýmettik jelide jazdy. Onyń aıtýynsha, qyzdyń burynǵy jigiti kezdesýge shaqyryp, ony óz kóliginde uryp-soqqan.

Almaty qalasynyń polıtsııa departamenti bul derekke qatysty túsinikteme berdi. Polıtsııa málimetinshe, oqıǵa boıynsha qylmystyq is qozǵalyp, jan-jaqty tergeý júrgizilgen. Tergeý barysynda oqıǵaǵa qatysy bar qyz jáne ózge de tulǵalar tolyqtaı suralǵan. Alaıda jábirlenýshi ata-anasymen birge aryz jazýdan jáne sot-medıtsınalyq saraptamadan ótýden bas tartqan.

— Tekserý nátıjesinde qyzdyń denesinde kórinetin jaraqat belgileri anyqtalǵan joq. Osy jaǵdaılardy eskere otyryp, sondaı-aq qadaǵalaýshy organnyń kelisimimen, qylmystyq is júrgizýdi zańda belgilengen tártippen qysqartý týraly sheshim qabyldandy, — dep habarlady departamentten.

Alaıda polıtsııa QR ІІM Almaty akademııasynyń tártiptik komıssııasynyń sheshimimen oqıǵaǵa qatysy bar kýrsant oqý ornynan shyǵarylǵanyn málimdedi.

Eske salaıyq, buǵan deıin Aqtóbede áıeldi uryp-soqqany úshin jazalanǵan ákim jumystan shyǵarylady.