Almatyda jartylaı marafonǵa qatysqan eki adam qaıtys boldy
ALMATY. KAZINFORM — Almatydaǵy Almaty Half Marathon sharasy kezinde eki adam kóz jumdy.
Marafon uıymdastyrýshylary málim etkendeı, júgirý kezinde eki qatysýshy kóz jumdy. Onyń biri — 84 jastaǵy Aqqoıan Rsalıev bolsa, ekinshisi 21 jastaǵy Nurbol Ahmadı.
— Uıymdastyrýshylar reglamentke saı áreket etti: medıtsınalyq qyzmetter, jedel qyzmetter jáne polıtsııa jedel jáne ýaqytyly qyzmet kórsetti. Alaıda qolǵa alynǵan sharalarǵa qaramastan, qatysýshylardyń ómirin saqtap qalý múmkin bolmady, — delingen habarlamada.
Jartylaı marafon 20 sáýirde tańerteń Tuńǵysh Prezıdent saıabaǵynan Ortalyq stadıonǵa deıingi baǵyt boıynsha ótti.
Uıymdastyrýshylardyń aıtýynsha, Aqqoıan Rsalıev 2021 jyldan beri jarystarǵa turaqty túrde qatysyp júrgen. Buǵan deıin Almaty jartylaı marafony men Almaty marafonynda 21,1 shaqyrym jáne 10 shaqyrym qashyqtyqty sátti baǵyndyrǵan.
Búgingi jartylaı marafonnyń alǵashqy kılometrinde ál-Farabı dańǵylynyń boıynda er adam kenetten ózin jaısyz sezinip, bir mınýttan soń oǵan jedel járdem brıgadasy kómekke kelgen. Ol kezde júrek soǵysy bolmaǵan.
— Saǵat 8:15–te Polıtsııa departamentiniń qyzmetkerleri qatysýshy qulap qalǵanyn málim etti. Jedel járdem bir mınýttyń ishinde jetken kezde, júrek soǵysy bolmaǵan. Reanımatsııalyq sharalar hattamaǵa saı jasaldy. Aldyn ala qorytyndy boıynsha oǵan ókpe arterııasynyń tromboembolııasy degen dıagnoz qoıylǵan. Onda sozylmaly arterıaldy gıpertenzııa bolǵan, — dep habarlady 2/51 brıgadanyń dárigeri Álibek Qojanazarov.
Qaıtys bolǵan ekinshi adam — Nurbol Ahmadı. Ol da buǵan deıin Winter Run 2025 sharasynda 10 km araqashyqtyqqa júgirýge qatysqan. Astana men Almatyda ótetin jartylaı marafonǵa, sonymen birge Almatydaǵy marafonǵa tirkelgen.
Búgin jartylaı marafonnyń 16-kılometrinde ol esinen tanyp qalǵan. Oqıǵa ornyna kelgen dárigerler reanımatsııalar sharalar jasaǵan. Alaıda brıgada kelgenshe ol qaıtys bolyp ketken.
— 09:18-de oqıǵa ornyna jetken kezde uıqy arterııasynda júrek soǵysy sezilmegen, tynys alý toqtaǵan, qan qysymy nólge teń boldy. Renaımatsııalyq sharalar hattamaǵa saı jasaldy. Nátıje bolmady. 103 brıgadasy kelgenshe ol jan tapsyrdy. Aldyn ala dıagnoz — ókpe arterııasynyń tromboembolııasy, jedel júrek jetkiliksizdigi, — dep atap ótti 8/58 brıgada dárigeri Áıgerim Esdáýletova.
Dárigerler qatysýshylar ólimi sot-medıtsınalyq sarapatamadan soń anyqtalatyny jáne onyń nátıjelerin jaqyn arada marqumdardyń týystaryna habarlaıtynyn jetkizdi.
— Júgirý sharasynda qatysýǵa tirkelý kezinde barlyq qatysýshy fızıkalyq turǵyda sporttyq sharaǵa qatysýǵa daıyn ekenin jáne óz densaýlyǵyny úshin tolyqtaı jaýapkershilik alatyny týraly qolhat jazady. Bul osyndaı marafondar ótkizý kezindegi álemde qoldanylatyn tájirıbe. Almaty Marathon qatysýshylaryna arnap biz jyl boıy turaqty túrde qaýipsiz júgirýge daıyndalý taqyrybynda sarapshylardy shaqyryp, tegin ashyq jattyǵýlar men dárister ótkizemiz. Shara bastalatyn kúni tamaqtaný oryndarynda jedel kómek kórsetý úshin barlyq qajetti jabdyǵy bar medıtsınalyq ujym otyrady. Júgirý baǵyttaryn aldyn ala polıtsııa, jedel járdem brıgadalary talqylaıdy, — dedi «Birinshi bolý — batyldyq» korporatıvtik qordyń atqarýshy dırektory Saltanat Qazybaeva.
Qor marqumdardyń týystarymen habarlasty. Otbasylaryna materıaldyq kómek kórsetýdi josparlap otyr.
Eske salaıyq, 2022 jyly Almaty marafonynyń qatysýshysy, 47 jastaǵy Rústem Sadyqov máre syzyǵyn kesip ótkenen keıin qaıtys bolǵan edi.
Osyǵan deıin megapolıste Almaty Marathon-ǵa oraı birqatar kósheniń jabylatyny jáne 68 qoǵamdyq kóliktiń baǵyty ýaqytsha ózgeretini týraly jazǵanbyz.