Almatyda jartylaı marafonǵa baılanysty birneshe kóshe jabylady

ALMATY. KAZINFORM – 21 sáýirde sportsúıer qaýym úshin Almaty jartylaı marafony ótedi. Bıyl jetinshi ret ret ótetin is-sharada qatysýshylar qalanyń basty kóshelerimen júgirip ótedi.

Almaty ákimdigi ońtústik astana turǵyndary men qonaqtaryna jarys ótetin kúni, 21 sáýirde joldardaǵy qozǵalystyń ishinara jabylatynyn málim etti.

Jarys ótetin kúni qalanyń myna joldary jabylady:

Jarys Tuńǵysh Prezıdent saıabaǵynda tańǵy 7:00-de bastalady. Mustafın kóshesinen Naýaı kóshesine deıingi ál-Farabı dańǵylynyń soltústik jaǵyndaǵy jol ýchaskesindegi qozǵalys 21 sáýir saǵat 00:00-den 11:00-ge deıin jabylady. Ońtústik jaǵy ashyq bolady.

Ál-Farabı dańǵylynyń soltústik jaǵymen Mustafın kóshesinen Nazarbaev dańǵylyna deıingi qozǵalys saǵat 6:45-ten 09:10-ǵa deıin jabylady. Ońtústik jaǵyndaǵy qozǵalysqa shekteý joq.

Seıfýllın dańǵylynyń ál-Farabı dańǵylynan Abaı dańǵylyna deıingi jol ýchaskesindegi qozǵalys saǵat 7:10-nan 08: 30-ǵa deıin tolyǵymen jabylady.

Abaı dańǵylynyń ońtústik jaǵymen Saın kóshesinen Baıtursynov kóshesine deıingi qozǵalys saǵat 8:10-nan 10:40-qa deıin jabylady. Soltústik jaǵy kólik qozǵalysyna ashyq.

Abaı dańǵylynyń ońtústik jaǵymen Seıfýllın kóshesinen Baıtursynov kóshesine deıingi qozǵalys saǵat 7:20-dan 09:00-ge deıin jabylady. Soltústik jaǵy kólik qozǵalysyna ashyq.

Saın kóshesiniń shyǵys jaǵymen ál-Farabı dańǵylynan Abaı dańǵylyna deıingi qozǵalys saǵat 08: 00-den 09:40-qa deıin jabylady. Batys jaǵynda kólik qozǵalysyna ruqsat.