Almatyda jarty jylda eńbek zańnamasy 600 ret buzyldy
ALMATY. KAZINFORM — Bıylǵy alǵashqy jarty jyldyqta Almaty boıynsha Memlekettik eńbek ınspektsııasy komıteti departamentine jeke jáne zańdy tulǵalardan 6 206 ótinish kelip túsken. Osy ýaqytta memlekettik eńbek ınspektorlary jospardan tys 566 tekserý jasap, sondaı-aq azamattardyń eńbek quqyǵyn qorǵaýǵa baǵyttalǵan 17 profılaktıkalyq baqylaý is-sharasyn júrgizdi.
Almaty boıynsha memlekettik eńbek ınspektsııasy departamenti basshysynyń mindetin atqarýshy orynbasary Talǵat Úmbetııarovtyń málimetinshe, tekseris kezinde eńbek zańnamasy 614 ret buzylǵany anyqtaldy. Onyń 588-i eńbek qatynasyna, 23-i eńbek qaýipsizdigi men eńbekti qorǵaýǵa, 3-i halyqty jumyspen qamtý týraly zańnamaǵa qatysty bolyp shyqqan.
— Júrgizilgen tekserýdiń nátıjesinde anyqtalǵan zań buzýshylyqty joıý týraly 389 nusqama berildi. Onyń 266-sy oryndalyp, oryndalý deńgeıi 68,4 pa ıyz boldy. 309 zańdy jáne jeke tulǵa ákimshilik jaýapkershilikke tartyldy. Salynǵan aıyppuldyń jalpy somasy 63,9 mln teńgege jetti. Onyń 37,7 mln teńgesi, ıaǵnı 70,9 paıyzy óndirildi, — dedi ol Óńirlik kommýnıkatsııalar qyzmetinde ótken brıfıngte.
Departamenttiń málimetinshe, bıylǵy alty aıda Almatyda óndiriste osyndaı 51 oqys oqıǵa tirkelgen. Sonyń saldarynan 51 qyzmetker zardap shekti: 27 adam aýyr jaraqat, 21 adam jeńil jaraqat alǵan.
Sondaı-aq jyldyń alǵashqy jartyjyldyǵynda qaladaǵy 53 kásiporynda jalpy somasy 59,4 mln teńge bolatyn jalaqy bereshegi óteldi. Qabyldanǵan sharalardyń nátıjesinde 105 qyzmetkerdiń eńbek quqyǵy qalpyna keltirildi.
Qazirgi ýaqytta Almatydaǵy tórt kásiporynnyń jalaqyǵa bereshegi bar. 73 qyzmetkerge tıesili jalpy qaryz kólemi 97,3 mln teńgegi jetip otyr.
Eske salaıyq, buǵan deıin memlekettik eńbek ınspektorlary respýblıkadaǵy 140 kásiporynda 1,1 myńnan astam jumysker aldynda 642 mln teńgeden asatyn jalaqy bereshegin anyqtaǵanyn habarlaǵanbyz.
