Almatyda jarty jylda 300 kelige jýyq esirtki tárkilendi
ALMATY. KAZINFORM – Óńirlik kommýnıkatsııalar qyzmetiniń alańynda nashaqorlyqqa qarsy kúres aılyǵynyń qorytyndysy týraly brıfıng ótti. Almaty qalasy Polıtsııa departamenti Esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili, polıtsııa podpolkovnıgi Dáýren Kóbeev 2024 jylǵy qańtar-maýsymdaǵy qala aýmaǵynda esirtki quraldarynyń zańsyz aınalymyna qarsy is-qımyl sharalary týraly aıtty.
Bıyl 6 aıda qala aýmaǵynda esirtkiniń zańsyz aınalymyna baılanysty 319 quqyq buzýshylyq anyqtalǵan. Jalpy jyl basynan beri esirtki quraldarynyń zańsyz aınalymyna baılanysty 147 qylmystyq is júrgizilip, sotqa joldanǵan. Sondaı-aq 268 kg 127,63 gr esirtki tárkilengen, onyń ishinde:
- 26 gr – geroın
- 165 kg 412 gr - marıhýana
- 73 kg 018 gr - gashısh
- 27 kg 996 gr - sıntetıka
- 1 kg 673 gr - basqa preparattar.
«Osy jyldyń 6 aıynda Esirtki qylmysyna qarsy is-qımyl basqarmasy qyzmetkerleri aýdandyq bólimshelerdiń qyzmetkerlerimen birlesip, qala aýmaǵynda esirtki quraldarynyń taralýy týraly aqparatty qamtıtyn 4185 graffıtı sýretteri tabyldy jáne boıaý arqyly joıyldy», - dedi Dáýren Kóbeev.
Sonymen qatar polıtsııa podpolkovnıgi QR QK 299-1 baby nasıhat faktileri boıynsha 5 qylmystyq is tirkelgenin jáne esirtkini jarnamalaýmen aınalysatyn 337 ınternet-saıt buǵattaý úshin «Kıbernadzorǵa» jiberilgenin atap ótti.
Eske salaıyq, buǵan deıin Almaty oblysynda jyl basynan beri 10 esirtki zerthanasy joıylǵanyn jazǵanbyz.
