Almatyda jármeńkege baılanysty taǵy da Sátbaev kóshesiniń bir bóligi jabylady
ALMATY. KAZINFORM — 16-17 qarasha kúnderi saǵat 8:00–den 17:00–ge deıin Almaty qalasynda keńeıtilgen aýylsharýashylyq jármeńkesi ótedi. Jármeńkege Almaty jáne Jetisý oblystarynyń aýylsharýashylyq óndirýshileri men fermerler qatysady.
Jármeńkege 50-den astam ónim túrleri (et jáne sút, jemis-kókónis, shujyq ónimderi, un, jarma, ósimdik jáne janýar maılary jáne t. b.) qoıylady.
Ónimniń jalpy kólemi 300 tonna, onyń ishinde:
* Et ónimi — 80 tonna;
* Jemis-kókónis ónimi — 100 tonna;
* Sút ónimi — 60 tonna;
* Balyq ónimderi — 5 tonna;
* Ózge ónimder — 55 tonna.
Aýyl sharýashylyǵy jármeńkesin ótkizýge baılanysty Sátbaev kóshesiniń Ýálıhanov kóshesinen Dostyq dańǵylyna deıingi bóligi 15 qarasha saǵat 20:00–den 17 qarasha saǵat 20:00–ge deıin jabylady.
— Ýaqytsha qolaısyzdyqtar úshin keshirim suraımyz jáne marshrýtyńyzdy aldyn ala retteýińizdi suraımyz. Jármeńkeni ótkizý kezinde № 45, № 95 jáne № 121 baǵyttardyń syzbalary ózgeredi. Jabylatyn ýchaskeni aınalyp ótý Abaı dańǵyly boıynsha júrgiziletin bolady, — dep habarlady ákimdikten.
Eske salaıyq, buǵan deıin Almatyda 7 jyldan beri salynyp jatqan kólik tonneli paıdalanýǵa beriletinin jazǵanbyz.
