Almatyda jarylǵysh zat týraly jalǵan habarlama taratqan balanyń ata-anasy jaýapqa tartyldy
Almatyda jarylǵysh zat týraly jalǵan habarlama taratqan jasóspirim ustalyp, nátıjesinde ata-anasy jaýapqa tartyldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, jarylǵysh zat týraly jalǵan habar taratýshy 14 jastaǵy jasóspirim bolyp shyqty. R. esimdi 2009 jyly týǵan azamat áleýmettik jeli arqyly tanysyna mektebine jarylǵysh zat qoıýdy josparlap júrgenin aıtqan.
"Polıtsııaǵa bul týraly 2 qazan kúni saǵat 10:43-te habarlama tústi. Jedel jáne arnaıy is-sharalar kesheni júrgizilip, nátıjesinde aty-jóni belgisiz adam anyqtaldy. Jas jigittiń sózinshe, jalǵan habarlama arqyly ol dosyn mazaq etpek bolǵan. Bul ázil úshin jasóspirimniń ata-anasy jaýapqa tartyldy. Olardyń ústinen QR ÁQBtK-niń 127-baby boıynsha ákimshilik is qozǵaldy. Jınalǵan ákimshilik materıal kámeletke tolmaǵandardyń isteri jónindegi mamandandyrylǵan aýdanaralyq sotyna joldanatyn bolady",, – dedi Almaty qalalyq polıtsııa departamentiniń ekstremızmge qarsy kúres basqarmasynyń bastyǵy Darhan Ábiqulov.
Polıtsııada sondaı-aq mundaı zańsyz áreketter tótenshe jaǵdaı men quqyq qorǵaý organdarynyń aıtarlyqtaı kúshi men resýrstaryn jumsaýǵa ákeletinin eske saldy. Sondaı-aq, ol úshin kináli adam jaýapqa tartylýmen qatar, sot sheshimimen jalǵan qońyraý shalǵany úshin shyǵyndy tolyǵymen tóleıdi.
Sondaı-aq, QR QK-niń 273-babyna sáıkes terrorızm aktisi týraly jalǵan habarlaý bes jylǵa deıin bas bostandyǵynan aıyrý túrinde jazalanady.
