Almatyda jappaı tóbeles bolyp, eki adam pyshaq jaraqatyn aldy

ALMATY. KAZINFORM – Almatydaǵy turǵyn úı keshenderiniń birinde eki er adam arasynda janjal shyǵyp, sońy jappaı tóbeleske ulasty.

Tóbelestiń vıdeosy áleýmettik jelide tarady. 

Polıtsııa departamentiniń málimetinshe, Áýezov aýdandyq polıtsııa basqarmasy sýyq qarý qoldaný arqyly buzaqylyq jasaý faktisi boıynsha qylmystyq is qozǵady.

— Atalǵan turǵyn úı kesheniniń turǵyndary arasynda bolǵan janjal saldarynan qatysýshylardyń biri eki adamǵa pyshaq suqqany anyqtaldy. Olarǵa medıtsınalyq kómek kórsetildi, — dep túsindirdi Almaty polıtsııa departamentiniń baspasóz qyzmeti.

Kúdiktiler anyqtaldy. Qazir atalǵan qylmysty ashýǵa baǵyttalǵan jedel-izdestirý sharalary júrgizilip jatyr.

Osyǵan deıin, qala meıramhanalarynyń birinde ózara tanys er adamdar arasynda janjal shyǵyp, olardyń biri ekinshisiniń aıaǵyna oq atqany týraly jazǵanbyz.