Almatyda japyraqtar mezgilinen buryn sarǵaıyp jatyr: sebebi nede
ALMATY. KAZINFORM — Almatyda jaz bitpeı jatyp aǵash japyraqtary sarǵaıyp, túse bastady. Kazinform tilshisi bul máseleniń sebebin anyqtap kórdi.
Ádette Almatyda aǵash japyraqtary kúz ortasyna qaraı sarǵaıyp, qala kósheleri altyn kilem jamylatyn. Alaıda keıingi jyldary turǵyndar megapolıste japyraqtardyń erte sarǵaıyp, qýraıtynyn baıqap júr. 2026 jyly da bul qubylys qaıtalandy.
Kazinform saýalyna jaýap bergen Almaty qalasy Kommýnaldyq ınfraqurylym jáne turǵyn úı ınspektsııasy basqarmasynyń málimetinshe, qalada aǵash japyraqtarynyń mezgilinen buryn sarǵaıýyna ártúrli faktorlar áser etedi. Máselen, shahardyń keı bólikterinde uzaq ýaqyt boıy aptap ystyqtyń saqtalýynan japyraqtar qýrap qalady. Ystyq aýa raıy birneshe apta boıy sozylsa, bul jasyl jelekke qosymsha salmaq túsiredi.
Osy oraıda, basqarma «japyraqtardyń mezgilinen buryn keýip ketýine sýdyń jetispeýi sebep boldy» degen boljamdy joqqa shyǵardy. Arnaıy tehnıkany sýmen toltyrý qaladaǵy arnaıy jabdyqtalǵan 22 sý alý pýnktinde júzege asyrylady. Jasyl jelekti sýarý úshin aryq jelisiniń sýy belsendi túrde paıdalanylady.
— Almaty aýmaǵyndaǵy jasyl jelekti sýarý úshin túrli sý kózderi paıdalanylady. Basty basymdyq tabıǵı sý resýrstaryn, onyń ishinde ózen sýy men aryq jelilerin barynsha paıdalanýǵa berilgen. Bul ortalyqtandyrylǵan sýmen jabdyqtaý júıesiniń sýyn barynsha únemdeýge múmkindik beredi. Qazirgi ýaqytta ózen sýy jasyl jelekti avtomatty túrde sýarý úshin de qoldanylady. Sondaı-aq mehanıkalandyrylǵan sýarý da júzege asyrylady. Ol úshin táýligine orta eseppen 3 myń m³ jýyq sý ketedi, — dep habarlady vedomstvo.
Sondaı-aq basqarma ókilderi sońǵy úsh jylda kóshelerdi, trotýarlar men jasyl jelekti sýarý úshin aýyzsýdy paıdalaný deregi tirkelmegenin atap ótti.
Eske salaıyq, buǵan deıin Almatyda qashan jergilikti aǵashtar otyrǵyzyla bastaıtynyn jazǵanbyz.
