Almatyda jaóspirimder arasynda Rolan Garros týrnıriniń irikteý jarysy ótedi
ASTANA. KAZINFORM — 17-22 tamyz aralyǵynda Almatydaǵy Gorky Tennis Park-tyń topyraq tósenishindegi korttarynda Roland Garros Junior Series by Renault — Qualifications West and Central Asia halyqaralyq irikteý týrnıri ótedi.
Jasóspirimder arasyndaǵy jarys Qazaqstan tennıs federatsııasy men Azııa tennıs federatsııasynyń (ATF) qoldaýymen uıymdastyrylyp otyr.
Qazaqstan tennıs federatsııasynan málim etkenindeı, is-shara Almaty qalasy ákimdiginiń qoldaýymen ótip, elimizde jyl saıyn tamyz aıynyń úshinshi jeksenbisinde atalyp ótetin Sport kúnine arnalady.
Týrnırge Ortalyq jáne Batys Azııa elderinen 16 jasqa deıingi eń úzdik 16 ul jáne qyz tennısshi qatysady. Іrikteý kezeńiniń jeńimpazdary qazan aıynda Japonııada ótetin Roland Garros Junior Series fınaldyq kezeńine joldama alady. Dál sol jarysta Roland Garros 2027 jasóspirimder týrnıriniń negizgi kezeńine beriletin jalǵyz joldama sarapqa salynady.
Bıyl Parıjdiń ańyzǵa aınalǵan topyraq korttarynda óner kórsetý múmkindigi úshin Qazaqstan, Ózbekstan, Qyrǵyzstan, Iordanııa, Iran, Sırııa, Saýd Arabııasy jáne Túrikmenstannyń jas tennısshileri baq synaıdy.
Qazaqstan namysyn Rodıon Traıgel, Dıas Tólepbergenov, Beksultan Baýyrjanov, Ivan Bondarenko, Ámına Nurmahan, Lınara Bólesheva, Alýa Marat jáne Vlada Kýzmenko qorǵaıdy.
Roland Garros Junior Series — Halyqaralyq tennıs federatsııasy (ITF) men Frantsııa tennıs federatsııasynyń (FFT) jasóspirimder tennısin damytýǵa baǵyttalǵan halyqaralyq jobasy. Bul serııa álemniń túkpir-túkpirinen kelgen daryndy jas tennısshilerge «Úlken dýlyǵa» týrnırleriniń biri sanalatyn jasóspirimder arasyndaǵy Frantsııa ashyq chempıonatyna (Roland Garros) qatysýǵa múmkindik beredi.
Eske sala keteıik, budan buryn Elena Rybakınanyń Toronto týrnırindegi tartysty matchta jeńiske jetkenin jazǵan edik.
Sondaı-aq Sonıa Jıenbaeva jekeleı synda Ispanııadaǵy týrnırdiń shırek fınalyna shyqty.
