Almatyda janjal shyǵarǵan 6 úndistandyq stýdent deportatsııalanady — Saıasat Nurbek

ASTANA. KAZINFORM — Ǵylym jáne joǵary bilim mınıstri Saıasat Nurbek Almatyda jappaı tóbeles shyǵarǵan úndistandyq stýdentter týraly pikir bildirdi.

Onyń aıtýynsha, janjalǵa tek qana úndistandyq stýdentter qatysqan, qazaqstandyq stýdentterdiń qatysy joq.

Qazirgi ýaqytta Almaty polıtsııa departamenti tergeý júrgizip jatyr.

— Sol tergeýdiń nátıjelerin kútemiz. Úndistan elshiligimen tikeleı baılanystamyn, elshimen de sóılestim. Osylaısha, birlesip, janjalǵa qatysqan stýdentterdi deportatsııaǵa jiberý sheshimin qabyldadyq. Bul bizdiń ishki naqty pozıtsııamyz. Jaqynda Prezıdentimiz «Ana tili» gazetine suhbat berdi. Kez kelgen shetelden kelgen azamattar óz elinde qalaı zań saqtasa, Qazaqstanda da solaı qatań zań saqtaýǵa mindetti. Sondyqtan tergeý sheshimi qandaı bolsa da, biz Úndistan elshiligimen birlesip, 6 stýdentti deportatsııaǵa jiberemiz, — dedi mınıstr Úkimette ótken brıfıngte.

Buǵan deıin Atyraý oblysynda tóbelesten 1 adam mert bolyp, 2-eýi aýrýhanaǵa túskenin jazdyq.