Almatyda jantúrshigerlik jol apatynan úsh adam zardap shekti

ALMATY. KAZINFORM — Almatyda jeńil kólik pen avtokran soqtyǵysty. 109 qutqarý qyzmetiniń habarlaýynsha, keshe saǵat 21:41-de 103 pýltine Saıaly yqshamaýdany Momyshuly kóshesi, Úlken Almaty aınalma avtomobıl jolynyń boıyndaǵy kólik apaty týraly aqparat tústi.

— Aldyn ala málimet boıynsha, jol apatynan úsh adam zardap shekti, olardyń bireýi kólikte qysylyp qalǵan. Saǵat 22:10-da oqıǵa ornyna 109 qutqarý qyzmetiniń qutqarýshylary jetti. Olardyń jedel jáne kelisilgen áreketteriniń arqasynda 22:18-de zardap shekken adamdar arnaıy tehnıkany qoldanbaı shyǵaryldy. Qutqarý jumystary jyldam aıaqtaldy, — dep atap ótti 109 baspasóz qyzmeti.

Túrli dene jaraqatyn alǵan úsh adam jedel járdem brıgadalaryna tapsyryldy. Olardyń bireýi №7 qalalyq klınıkalyq aýrýhanaǵa, ekinshisi oblystyq klınıkalyq aýrýhanaǵa, úshinshisi ekinshi balalar aýrýhanasyna jetkizildi.

Buǵan deıin Almatyda avtobýs birneshe jeńil kólikpen soqtyǵysqany týraly jazǵanbyz. Saldarynan 6 zardap shekti. 

Eske salaıyq, 2 maýsymda Astanada avtobýs júrgizýshisi rólge ıe bola almaı, jol jıegindegi baǵanǵa soǵyldy. Jedel medıtsınalyq járdem brıgadalary qala statsıonarlaryna barlyǵy 15 adamdy jetkizdi. Olardyń úsheýi aýrýhanaǵa jatqyzyldy. Jol apaty kezinde zardap shekken qyz balanyń aıaǵyna ampýtatsııa jasaldy.