Almatyda janyp jatqan páterden 7 jastaǵy bala qutqaryldy

ALMATY. KAZINFORM — Almatyda kóppáterli turǵyn úıden órt shyǵyp, kishkentaı bala qutqaryldy.

Almaty qalalyq Tótenshe jaǵdaılar departamentiniń málimetinshe, Jetisý aýdany Aınabulaq-3 shaǵyn aýdanynda bes qabatty turǵyn úıdiń birinshi qabatyndaǵy páterde órt shyqty.

«Órt sóndirýshiler janyp jatqan páterden 2017 jyly týǵan balany qutqardy. Órt 50 sharshy metr alańda sóndirildi. Qutqarylǵan bala jedel medıtsınalyq járdem qyzmetkerlerine tapsyryldy», — dep habarlady vedomstvodan.

Belgili bolǵandaı, ul bala eresekterdiń qaraýynsyz úıde jalǵyz bolǵan.

Eske salsaq, buǵan deıin Aqsaıda turǵyn úıdegi órt saldarynan 2 bala, 1 áıel jansaqtaý bólimine jatqyzylǵany anyqtaldy.