Almatyda Jandosov kóshesindegi asfalt ne úshin alynyp jatyr: ákimdik jaýaby
ALMATY. KAZINFORM — Almatydaǵy Jandosov kóshesinde áli jańa asfalt alyp tastaldy.
Áleýmettik jelilerde Almaty turǵyny Jandosov kóshesindegi jol jóndeý jumystaryn kórsetken vıdeo tarady.
Onyń aıtýynsha, jumysshylar jaqsy kúıde turǵan asfaltty alyp tastap jatyr.
Er adam asfalttyń ornyna jańa taqtalar tóselýi múmkin dep boljaıdy. Alaıda ol áli jańa jabyndy aýystyrǵanǵa qarsy. Sondaı-aq ol bıýdjet qarajatyn bulaı jumsaýdyń qanshalyqty oryndy ekenin surady.
Almaty qalasynyń Qoǵamdyq keńistikterdi damytý basqarmasy Jandosov kóshesinde keshendi abattandyrý jobasy júzege asyrylyp jatqanyn habarlady.
— Júrgizilip jatqan jumystarǵa baǵa berý kezinde jekelegen ýchaskelerge ǵana emes, kósheniń jalpy jaǵdaıy men jobalyq sheshimderge nazar aýdarý qajet. Kósheniń keıbir ýchaskelerinde asfalt tóselse, basqa bólikterinde trotýarlyq brýschatka bar. Sonymen qatar qoldanystaǵy jabyndardyń tozý deńgeıi ártúrli. Kóptegen ýchaskelerde jabynnyń búlinýi, shógýi jáne deformatsııalanýy baıqalady, — delingen habarlamada.
Sózderinshe, jumys árbir ýchaskeni jeke-jeke tańdap jóndeýge emes, bekitilgen jobalyq-smetalyq qujattamaǵa sáıkes tıisti aýmaqtardy júıeli túrde jańartýǵa baǵyttalǵan.
— Áńgime jabyndy jaı ǵana aýystyrý týraly emes, kósheni keshendi abattandyrý týraly bolyp otyr. Joba jaıaý júrginshiler ınfraqurylymynyń birizdiligin qamtamasyz etýge, júrip-turýdyń qolaılylyǵy men qaýipsizdigin arttyrýǵa, sondaı-aq qalalyq keńistiktiń tutas kelbetin qalyptastyrýǵa baǵyttalǵan. Sondyqtan júrgizilip jatqan jumystardyńtúpki nátıjesin eskerý qajet, — dedi ákimdik.
Eske salsaq, Taldyqorǵanda asfalt sapasyna qatysty vıdeo qyzý talqyǵa tústi.
