Almatyda jańbyr saldarynan jol opyrylyp tústi

ALMATY. KAZINFORM –  Almatydaǵy «Nur Alataý» shaǵyn aýdanynda jaýyn-shashyn saldarynan joldyń bir bóligi opyrylyp tústi.

Onyń vıdeosy áleýmettik jelide paıda boldy.

Almaty ákimdiginiń málimetinshe, tolassyz jaýǵan jańbyr saldarynan 22 naýryzda «Nur Alataý» shaǵyn aýdanynda ornalasqan Q.Salyqov kóshesi boıynyń bir bóligi opyrylyp tústi. Merdiger kompanııa qajetti jumystardy júrgizip jatyr.

Ákimdikten atap ótkendeı, 2014 jyly qalaǵa qosylǵan «Nur-Alataý» shaǵyn aýdanyndaǵy Q.Salyqov kóshesiniń boıynda aryq júıesi joq bolatyn. Sý tasqynynyń aldyn alý maqsatynda aýdan ákimdiginiń tapsyrysy boıynsha qalanyń ortalyq bóligindegi aryq jelileri men nóser kárizderin salý jáne qaıta jańartý jobasyna joǵaryda atalǵan kóshe qosyldy.

Atalǵan jobany júzege asyrý aıasynda «AlmatyDorStroı Kompanı» JShS merdigerlik uıymy 2023 jyly Q.Salyqov kóshesiniń boıynda jalpy uzyndyǵy 1 350 metr sý burý aryq júıesin salý jumystaryn bastady. Qurylys-montaj jumystaryn osy jyldyń sáýir aıynyń sońyna deıin aıaqtaý josparda.