Almatyda jańbyr kezinde 13 úıdi sý basty: otbasylar qonaqúıge ornalastyryldy

ALMATY. KAZINFORM – 16 qyrkúıekte qatty jaýyn-shashyn saldarynan Aqbastaý jáne Besqash kóshelerinde ornalasqan 13 jeke turǵyn úıdi sý basty.

Oqıǵanyń beınejazbasy búgin áleýmettik jelide tarady.

Almaty ákimdiginiń málimetinshe, eki otbasynyń 7 adamy (onyń ishinde balalar bar) ýaqytsha qonaqúıge ornalastyryldy. Barlyǵy 6 turǵyn úı men 7 aýlaǵa sý kirgen. Ákimdik sý basýdyń negizgi sebebi retinde jaýyn kezinde ózen deńgeıiniń aıtarlyqtaı kóterilýi, Boraldaı ózen arnasynyń ótkizý qabiletiniń tómendigi jáne gabıon arnasynyń jetkiliksiz qımasy ekenin kórsetti.

- Budan bólek ózen sý qorǵaý aımaǵyn buza otyryp salynǵan turǵyn úıler ornalasqan tyǵyz qonystanǵan aýmaqtar arqyly aǵady. Qazirgi ýaqytta sýdy keptirý jumystary tolyq aıaqtaldy. Barlyǵy 2120 tekshe metr sý soryldy. Jumysqa 1 júk tıegish, 2 «Gazel» kóligi, 4 motopompa jáne 5 assenızator tehnıkasy jumyldyryldy, - dep habarlady ákimdikten.

Jaǵdaıdy Alataý aýdanynyń ákimi, qalalyq qutqarý qyzmetiniń ókilderi jáne ózge de jaýapty mamandar baqylaýda ustap otyr. Al ózen arnasynda qaıta qurý jumystary júrgizilip jatyr. Jobalanǵan aýmaqtyń jalpy uzyndyǵy – 2 shaqyrym, aıaqtalý merzimi 2026 jyldyń tamyzy dep josparlanǵan.

- Joba aıasynda qoldanystaǵy gabıondy qurylystardy buzý, ózenge quıatyn sý burǵyshtar ornatý, arnany temirbeton kanalmen bekitý, tosqaýyl qorshaý ornatý, topyraq qazý, qoldanystaǵy ótkelderdi keńeıtip qaıta qurý jáne ótkelderge qorshaýlar ornatý qarastyrylǵan, - dep málimdedi ákimdikten.

Eske salaıyq, 16 qyrkúıek qatty jaýyn-shashyn kezinde Almatyda jol jabyny opyrylyp, 13 avtokólik zaqymdandy.