Almatyda jańajyldyq bezendirýge qansha qarajat jumsalady
ALMATY. KAZINFORM — Almatyda Jańa jyl meıramyn toılaýǵa daıyndyq bastaldy.
Qaladaǵy Abaı alańyn bezendirýge, jańajyldyq ınstallıatsııalar ornatýǵa, merekelik kontsert ótkizýge jáne qala kóshelerin jaryqtandyrý arqyly ásemdeýge 512,3 mln teńgeden astam qarajat baǵyttaý josparlanyp otyr. Tıisti habarlandyrýlar memlekettik satyp alý portalynda jarııalandy.
Shyǵyndardyń negizgi bóligi Abaı alańyn bezendirýge qarastyrylǵan. Máselen, Almaty mádenıet basqarmasynyń «Almaty áýenderi» KMQK Jańa jylǵa oraı Abaı alańyn bezendirý boıynsha jalpy somasy 288,7 mln teńgelik tórt lot jarııalady. Tehnıkalyq erekshelikterge sáıkes, alańda bıiktigi keminde 13 metr bolatyn jáne úsh qabatty, onyń bir qabaty aınalatyn jańajyldyq shyrsha ornatylady. Ony quryp, ornatýǵa 74,9 mln teńge bólinbek.
Odan bólek 79,4 mln teńge 20 saýda úıshigi men birneshe shaǵyn sáýlet nysandaryn ornatýǵa baǵyttalady. Olardyń qatarynda «2027» sandary bar jaryqdıodty kompozıtsııa, shabadan, retrotelefon, áýe shary jáne radıoqabyldaǵysh túrindegi fotoaımaqtar bar.
Taqyryptyq jańajyldyq ınstallıatsııalarǵa, onyń ishinde syılyq, gramofon, telefon býdkasy jáne táttiler túrindegi kompozıtsııalarǵa 64,9 mln teńge qarastyrylǵan. Taǵy 69,4 mln teńge Abaı alańy men Respýblıka saraıynyń mańyndaǵy keminde 100 aǵashty jaryqpen bezendirip, fontandardy jabý jáne dekoratıvti elementter ornatý úshin bólinedi.
Sahnany tehnıkalyq jabdyqtaýǵa jáne jańajyldyq kontserttik baǵdarlamany ótkizýge taǵy 138,9 mln teńge qarastyrylǵan.
Onyń tehnıkalyq erekshelikterine sáıkes, 69,4 mln teńgelik birinshi lot sahnany tehnıkalyq jabdyqtaýdy qamtıdy. Bul tizimge dybys jáne jaryq jabdyqtary, sahna, alty jaryq munarasy jáne úsh kún boıy tehnıkalyq súıemeldeý kiredi.
Ekinshi lotqa 69,4 mln teńge jumsaý josparlanyp otyr. Ol kontserttik baǵdarlamany uıymdastyrýdy kózdeıdi. Úsh kúnniń árqaısysynda keminde bes tanymal estrada ánshisi, bı jáne balalar shyǵarmashylyq ujymdary óner kórsetedi. Sondaı-aq Aıaz Ata men Aqshaqardyń qatysýymen jańajyldyq teatrlandyrylǵan qoıylym, qazaq jáne orys tilderinde júrgizýshilerdiń jumysy qarastyrylǵan.
Budan basqa Almaty mádenıet basqarmasy qala kóshelerin jaryqtandyrý arqyly bezendirýge baıqaý jarııalady. 320 dana eki jaqty jaryqdıodty konstrýktsııany jasaý jáne ornalastyrý úshin 84,8 mln teńge qarastyrylǵan.
Osylaısha, Almatyny jańajyldyq bezendirý men merekelik sharalarǵa jarııalanǵan lottardyń jalpy somasy ázirge 512 mln teńge kóleminde tur. Bul soma aldaǵy ýaqytta jańa memlekettik satyp alý qyzmetterimen tolyǵyp, ósýi de múmkin.
Eske salaıyq, buǵan deıin Almatyda qala kúnine 3D shoý uıymdastyrýǵa 200 mln teńge jumsalǵanyn jazǵanbyz.
