Almatyda jańartylǵan «Baǵanashyl» balalar úıi qashan qoldanysqa beriledi
ALMATY. KAZINFORM – Almatynyń «Baǵanashyl» shaǵyn aýdanynda ornalasqan balalar úıi kúrdeli jóndeýden ótip jatyr.
Nysan rekonstrýktsııasy 2025 jyly kúzde bastalǵan bolatyn. Osy oraıda, agenttik Almaty qalasynyń bilim basqarmasy saýal joldap, ǵımarattyń qashan qoldanysqa beriletinin surady.
Vedomstvo jaýabyna sáıkes, Syrǵabekov kóshesi, 22 mekenjaıynda ornalasqan Arnaýly áleýmettik qyzmetterge muqtaj balalardy qoldaý ortalyǵynda qurylys-montajdaý jumystary júrgizilip jatyr. Onyń ishinde eski nysandardy buzyp, jańasyn salý da bar.
- «QazQSǴZI» AQ-nyń ǵımarattardyń fızıkalyq tozý dárejesin anyqtaý nátıjeleri boıynsha bergen qorytyndysyna sáıkes 4 blokty buzý týraly sheshim qabyldandy. Bir blok boıynsha qurylymdardy kúsheıtý jumystary oryndalyp jatyr. Obektiniń jalpy qurylys daıyndyǵy - 40 %, - dep habarlady Bilim basqarmasynan.
Buzylǵan bloktardyń ishinde sport zaly, kir jýý kesheni, ashana jáne ákimshilik korpýs bolǵan. Onyń ornyna jańa tórt bloktyń irgetastaryn ornatý jumystary aıaqtalǵan. Qazir qabyrǵalar men baǵanalardy turǵyzý, sondaı-aq konstrýktsııalardy armatýralaý jumystary istelip jatyr. Odan bólek jatyn korpýsynyń qurylymdaryn seısmıkalyq kúsheıtilgen.
Qurylys jumystary aıaqtalǵan soń, joba aıasynda balalar jaıly jaǵdaı jasaý úshin ortalyqty jańa jıhaz jáne qajetti jabdyqtarmen qamtamasyz etý kózdelgenin atalyp ótti.
- Jobada kózdelgen barlyq jumysty osy jyldyń sońyna deıin aıaqtaý josparlanyp otyr, - dep naqtylady vedomstvodan.
Bilim basqarmasynyń ókilderi nysandy jańǵyrtýǵa jeke kompanııanyń qarajaty jumsalǵanyn jáne jáne jergilikti bıýdjetten qarjylandyrý bolmaǵanyn málimdedi.
Eske salaıyq, «Baǵanashyldaǵy» balalar úıi bastapqyda Almaty oblysyna tıesili bolǵan edi. 2025 jyldyń 21 shildesinde mekeme tárbıelenýshileri Almatydan Qonaevqa kóshirile bastady. Alaıda balalar buǵan narazylyq bildirip, áleýmettik jelide mekeme ishindegi kıkiljińniń beınejazbasy tarady. Keıin Prezıdent tapsyrmasymen «Baǵanashyl» balalar úıi eshqaıda kóshirilmeıtini, qaıta Almaty qalasynyń qaramaǵyna ótetinin habarlandy.
«Baǵanashyl» balalar úıindegi daýdan keıin úsh sheneýnik qyzmetinen bosatyldy.
2025 jyldyń tamyz aıynda mekeme Almaty qalasynyń kommýnaldyq menshigine ótti. Sondaı-aq №2 Balalardy qoldaý ortalyǵyna «Baǵanashyl» balalar úıiniń tárbıelenýshileri men qyzmetkerleri ýaqytsha kóshirildi.
2025 jyldyń qarasha aıynda balalar úıinde kúrdeli jóndeý jumystary bastaldy.
