Almatyda jańarǵan Tereńqur-2 saıabaǵyn kútip ustaýǵa 400 mln teńge jumsalady
ALMATY. KAZINFORM — Jaqynda almatylyqtardyń súıikti oryndarynyń biri — Tereńqur aımaǵynda jóndeý jumystary aıaqtaldy.
Buryn sýy tartylǵan toǵan men qaraýsyz aýmaq bolǵan Tereńqur-2 saıabaǵy tolyqtaı qaıta jańǵyrtyldy. Atap aıtqanda, 2023 jyly toǵan jáne oǵan irgeles aýmaq kommýnaldyq menshikke qaıtarylǵan. 2024 jyly qurylys jumystary bastalyp, 2025 jyldyń tamyz aıynda aıaqtaldy.
Jalpy 4 gektardan astam aýmaqta zamanaýı saıabaq qurylǵan: jaǵalaýy bar toǵan qaıta qalpyna keltirildi, balalar alańdary, serýen joldary, sport jáne demalys aımaqtary jasaldy. Jańa jaryqtandyrý ornatylyp, kógaldandyrý boıynsha jumystar júrgizildi.
Endi Almaty qalasynyń ákimdigi saıabaqty kútip ustaý úshin 422 mln teńge jumsamaq. Mundaı qyzmet boıynsha habarlandyrý Memlekettik satyp alý saıtynda jarııalandy.
Qujatta kórsetilgen tehnıkalyq erekshelikterge sáıkes, jaýapty uıym Tereńqur-2 saıabaq aımaǵynda kópirlerdi, qubyrlardy jáne sý qoımasyn laıdan tazartýǵa mindetti. Odan bólek sý qoımasyndaǵy qoqysty kúndelikti jınasa, al jalpy aýmaqta qoqysty aptasyna bir ret jınap, shyǵarýy qajet.
Sonymen qatar qorshaýlardy jylyna 2 ret syrlaý, ósimdik jamylǵysyn 10 santımetrden aspaıtyndaı shabý, aramshópti julý, arna júıelerinde sýdyń úzdiksiz aǵýyn qamtamasyz etý, saıabaq joldaryna kútim jasaý, jasyl jelekti sýarý syndy jumystar tapsyrylady.
Eske salaıyq, byltyr almatylyqtar áleýmettik jelide Tereńqurda aǵashtar shabylǵanyna shaǵymdanǵan bolatyn.