Almatyda jańadan qurylǵan basqarmalar jumysyn qashan bastaıdy

ALMATY. KAZINFORM – Almaty máslıhaty 4 basqarmanyń ataýyn ózgertip, jańa 2 basqarma qurý týraly sheshim qabyldady.

Sheshim tamyz aıynda qabyldanǵanymen, basqarmalardyń resmı saıttarynda ataýlary áli ózgermegen jáne ekige bólingen qalalyq mobıldilik basqarmasy jumys istep tur. Osyǵan oraı, qala basshylyǵyna saýal joldadyq.

Resmı jaýapqa sáıkes, qazirgi tańda tıisti normatıvtik-quqyqtyq aktilerdi tirkeý jáne uıymdastyrýshylyq-tehnıkalyq rásimder júrgizilip jatyr.

- Eki jańa basqarma – Almaty qalasy jol qozǵalysy jáne jolaýshylar kóligin uıymdastyrý basqarmasy men Almaty qalasy jol ınfraqurylymyn damytý basqarmasy Ádilet departamentiniń memlekettik tirkeý týraly anyqtamasy boıynsha resmı túrde 22 qyrkúıekte quryldy. Keıinirek ákimdiktiń resmı saıtynda jarııalanatyn bolady. Basqa basqarmalardyń ataýyn ózgertý týraly sheshim zańdy kúshine endi, tehnıkalyq túzetýler engizilip jatyr, - delingen jaýapta.

Sondaı-aq burynǵy qalalyq mobıldilik basqarmasynyń basshysy Saǵyndyq Telibaev jańa qurylymdyq ózgerister aıaqtalǵanǵa deıin óz laýazymynda qyzmetin jalǵastyryp jatqany habarlandy. Jańa vedomstvolardyń basshylary keıin Qazaqstan Respýblıkasynyń qoldanystaǵy zańnamasyna sáıkes taǵaıyndalady.

- Jol qozǵalysy jáne jolaýshylar kóligin uıymdastyrý basqarmasy – qaladaǵy qoǵamdyq kólikti damytý, jolaýshylar tasymalyn uıymdastyrý, jol qozǵalysyn retteý jáne qaýipsizdigin qamtamasyz etýge baǵyttalǵan qyzmetti oryndaıdy. Al jol ınfraqurylymyn damytý basqarmasy – jol ınfraqurylymyn jobalaý, salý, jóndeý jáne jańǵyrtý jumystaryn úılestiredi, sondaı-aq ınjenerlik-tehnıkalyq ınfraqurylymnyń sapasyn arttyrýǵa jaýapty bolady, - dep túsindirdi ákimdikten.

Eske salaıyq, buǵan deıin Almatyda qarjy men ekonomıka basqarmalary birigip, 4 basqarmanyń ataýy ózgergenin jazǵanbyz.