Almatyda Jańa jyl túninde tártip saqtaýǵa úsh myńnan astam polıtseı jumyldyrylady
Almatyda «Astana» alańynda polıtsııanyń biriktirilgen kúshteriniń sap túzeýi ótti, dep habarlaıdy Kazinform.
Tártip saqshylarynyń sap túzeýin Almaty qalalyq polıtsııa departamentiniń bastyǵy, polıtsııa general-maıory Arystanǵanı Zapparov júrgizdi.
«Ózderińiz biletindeı polıtsııanyń basty mindeti – qoǵamdaǵy turaqtylyqty, zańdylyq pen azamattardyń qaýipsizdigin qamtamasyz etý, sonymen qatar halyqpen sapaly jańa qarym – qatynas ornatý jáne halyqtyń senimine ıe bolý bolyp tabylady. Bizdiń qyzmetkerler – qoǵamnyń turaqtylyǵy men jerimizdiń qorǵany, tynyshtyqtyń saqshysy, memleket qaýipsizdiginiń kepili. Ár qyzmetker qylmyspen kúres jáne azamattardyń quqyqtary men zańdy múddelerin qorǵaý isine úlesin qosýda. Biz Otan aldynda qyzmettik boryshyn adal oryndaıtyn departament qyzmetkerlerin maqtan tutamyz», - dedi, Arystanǵanı Zapparov.
Eske salaıyq, Almaty polıtseıleri qyzmettiń kúsheıtilgen túrine aýystyryldy. Patrýldik jasaqtardyń sany ulǵaıtyldy, qyzmet kórsetý marshrýttary kúsheıtildi, jaıaý patrýldik qyzmetke Ulttyq ulannyń 300 áskeri tartyldy. Azamattar kóp jınalatyn oryndar men mádenı-oıyn-saýyq sharalary ótetin oryndar erekshe baqylaýda bolady.
«Qurmetti áriptester! Almaty qalasy polıtsııa departamenti basshylyǵy jáne óz atymnan barshańyzdy Jańa jyl merekesimen quttyqtaımyn! 2024 jyl yrys pen yntymaqtyń, bereke men baılyqtyń, beıbitshilik pen baqyttyń jyly bolsyn. Sizderge jáne otbasylaryńyzǵa zor densaýlyq, beıbit ómir jáne qoǵamdyq tártipti qamtamasyz etý, el tynyshtyǵyn qorǵaý jolyndaǵy qajyrly eńbekterińizge sáttilik tileımin!», – dedi, Almaty polıtsııasynyń basshysy.
View this post on Instagram
