Almatyda Jańa jyl túni pırotehnıkadan 20 adam zardap shekti

ALMATY. KAZINFORM – Jańajyldyq mereke kúnderi Almatynyń jedel medıtsınalyq járdem qyzmeti shtattyq rejımde jumys istedi.

2025 jylǵy 31 jeltoqsan men 2026 jylǵy 4 qańtar aralyǵynda jedel járdem qyzmetine 11 158 ótinish túsip, onyń 10 059-yna baryp qaıtty. Jedel járdemge eń kóp qońyraý ádettegideı jańa jyl túni túsken. 1 900 shaqyrtý tirkelgen, bul ortasha táýliktik kórsetkishten shamamen 600-ge az. Bul týraly Almaty jedel medıtsınalyq járdem qyzmeti dırektorynyń orynbasary Andreı Lojkın aıtty.

Mereke kúnderi shaqyrtý qurylymy qalypty deńgeıde qalyp, demalys nemese saltanatty kúnderge táýeldi bolǵan joq. Kóbinese turǵyndar tynys alý júıesi aýrýlaryna baılanysty – 22,53%, júrek-qan tamyrlary júıesi aýrýlary boıynsha - 17,28%, sondaı-aq jaraqattar men ýlanýlarǵa baılanysty - 14,5% jedel járdemge júgingen.

– Pırotehnıkadan jaraqattanyp qalatyndarǵa medıtsına qyzmetkerleri erekshe nazar aýdardy. Bıyl mundaı 20 oqıǵa tirkeldi, onyń 11-i – bala. Zardap shekkenderdiń eń kishisi 4 jastaǵy bala boldy. 10 adam jedel járdemmen statsıonarǵa jetkizildi, jeteýi dárigerge óz betinshe júginip, úsheýi jaraqaty jeńil bolǵandyqtan aýrýhanaǵa jatýdan bas tartty, - dedi Andreı Lojkın.

Onyń sózinshe, mereke kúnderi kún saıyn 24/7 rejıminde 189 brıgada jelide jumys istegen. 500-den astam qyzmetker – dáriger, feldsher, júrgizýshi, kishi medıtsınalyq jáne tehnıkalyq personal eńbek etti.

Sonymen qatar osy kúnderi jedel járdem qyzmetkerleri bes sátti reanımatsııa jasaǵan. Úsh adamdy úıde bosandyryp, bir ul men eki qyzdyń dúnıege kelýine kómektesti.

Eske salaıyq, buǵan deıin Almatyda zańsyz aınalymnan jarty tonnadan astam pırotehnıka tárkilengenin habarlaǵanbyz.