Almatyda jańa jyl merekesinde ótetin eki aıtýly is-shara
2023 jyl da aıaqtalýǵa sanaýly saǵattar qaldy. Merekeniń sıqyrly atmosferasyna enetin ýaqyt keldi. Osy oraıda Kazinform jańa jylda Almaty qalasynda ótetin mańyzdy eki merekelik is-sharany usynady.
Almatyda jańa jylǵa arnalǵan otshashý ótedi. Atalmysh is-shara demeýshilerdiń qarjysyna uıymdastyrylady. Almaty qalasynyń ákimdigi otshashý kezinde qaýipsizdik sharalary qatań saqtalatynyn habarlaǵan bolatyn.
Buǵan qosa, 18.00-den 20.00-ge deıin Almatynyń ár aýdanynda qysqy festıval aıasynda jańa jyldyq kontserttik baǵdarlamalar ótedi.
Sondaı-aq 2023 jyldyń 31 jeltoqsanynan 2024 jyldyń 1 qańtaryna deıin Almatydaǵy Abaı alańynda alǵash ret Poetry Date Halyqaralyq jańa jyldyq poezııalyq aktsııasynyń túsirilimi bolady. Translıatsııa Almaty ýaqyty boıynsha saǵat 14:00-de bastalady jáne Qytaıdyń CGTN iri jahandyq televızııalyq jelisiniń medıa platformasynda tikeleı efırde kórsetiledi.
Álemniń 7 qalasy ǵana jańa jyldyq telemarafonǵa qatysa alady. Almatydan basqa bıyl Parıj, Sıdneı, Kaır, Mehıko, Sıan jáne Chanshı efırge qosylady.
Translıatsııa medıa platformada 24 saǵat ishinde ótedi. Aktsııaǵa kez kelgen adam qatysa alady, ol úshin óleńdi qazaq nemese orys tilinde oqý jetkilikti.Poetry Date jańa jyldyq beınebaıanyna qazaq estradasynyń juldyzdary, tanymal ártister men aqyndar qatysady.
