Almatyda Jańa jyl merekesinde 65 qylmys jasaldy

ALMATY. KAZINFORM — 31 jeltoqsan men 4 qańtar aralyǵynda Almatyda 65 qylmys tirkeldi. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq Polıtsııa departamentiniń resmı ókili Saltanat Ázirbek aıtty.

Spıkerdiń sózinshe, jasalǵan qylmystyń basym bóligi múliktik jáne turmystyq sıpatta boldy. Onyń ishinde 42 qylmys «izi sýymaı» ashyldy. Sonymen qatar, mereke kúnderi 200-den astam ákimshilik quqyq buzýshylyq anyqtalyp, joly kesildi.

— Mereke kúnderi qyzmetter men bólimshelerdiń jeke quramy kúsheıtilgen qyzmet rejıminde jumys istedi. Patrýldik polıtsııa narıadtarynyń sany ulǵaıtyldy, jaıaý patrýldeý marshrýttary ázirlendi, sondaı — aq quqyqtyq tártipti qorǵaý úshin Ulttyq ulannyń 300 áskerı qyzmetshisi tartyldy, — dep atap ótti S.Ázirbek.

Aıtýynsha, azamattar kóp jınalatyn jáne merekelik is-sharalar ótkiziletin oryndarǵa erekshe nazar aýdaryldy.

—Qala joldarynda 26 mas júrgizýshi ustalyp, kólik aıdaýdan shettetildi, bul qaýipsizdikti qamtamasyz etý jónindegi negizgi sharalardyń birine aınaldy,— dedi polıtsııa ókili.

Osyǵan deıin Almatyda mereke kúnderi qoǵamdyq tártipti qamtamasyz etý úshin 3 myńnan astam polıtsııa qyzmetkeri jumyldyrylǵany týraly jazǵan edik.