Almatyda jańa jyl qarbalasynda urlyq jasaǵan kúdiktiler ustaldy
ALMATY. KAZINFORM — Almatyda krımınaldyq polıtsııa qyzmetkerleri adam kóp shoǵyrlanatyn oryndarda jasalǵan birqatar qalta urlyǵyn áshkereledi.
Jedel izdestirý barysynda úsh kúdikti qolǵa tústi. Ekeýi top bolyp áreket etken, taǵy biri qylmysty jalǵyz jasaǵan.
Kúdiktiler jańa jyl aldyndaǵy qarbalasta azamattardyń beıqamdyǵyn paıdalanyp, saýda úıleri, azyq-túlik dúkenderi jáne qoǵamdyq kólikterde ózgeniń qaltasyna qol suqqan.
Aldyn ala derekterge sáıkes, top músheleri keminde 12 qalta urlyǵy epızodyna, al úshinshi kúdiktiniń keminde 7 urlyqqa qatysy bar ekeni anyqtaldy. Barlyǵy ýaqytsha ustaý ızolıatoryna qamaldy, ári qosymsha qylmystyq isterdi anyqtaý jumystary jalǵasyp jatyr.
Almaty polıtsııa departamenti krımınaldyq polıtsııa basqarmasynyń bastyǵy Ashat Dáýletııarov qala turǵyndary men qonaqtaryn saq bolýǵa úndedi.
— Azamattar jeke zattaryna muqııat qaraýy kerek. Telefon men ámııandy syrtqy qaltada qaldyrmańyz, sómkeni aldyńyzda ustap, qoǵamdyq kólikte jáne adam kóp jınalatyn jerlerde saq bolyńyz, — dedi ol.
Eske salaıyq, buǵan deıin Almaty oblysynda barymtamen aınalysqan qylmystyq top ustalǵanyn habarlaǵanbyz.