Almatyda jańa jaǵalaý paıda bolady
ALMATY. KAZINFORM — Almaty qalasynyń Naýryzbaı aýdanynda «Almaty — bizdiń ortaq úıimiz» naýqany aıasynda 7,7 shaqyrymǵa sozylyp jatqan «Qarǵaly» ózeniniń jaǵalaýy qaıta jańartylyp jatyr.
Almaty ákimdiginiń málimetinshe, aktsııanyń úshinshi aptasy «Bizdiń qala — bizdiń taýlar, ózender men kólder» urany aıasynda ótip jatyr. Osy ýaqyt ishinde jaǵalaýlar men sý aıdyndary, saıabaqtar, skverler men taý bókteri tazartylady.
Qarǵaly jobasynyń maqsaty — bul aımaqtyń ekojúıesin saqtaı otyryp, qala turǵyndarynyń demalýy úshin neǵurlym yńǵaıly ári tartymdy orta jasaý.
«Munda ózen arnasyn tazartyp, serýendeý aımaǵyn qurý josparlanǵan. 3 myńǵa jýyq aǵash otyrǵyzylady. Sondaı-aq kópjyldyq gúlder men shópterdiń gúlzary, qylqan japyraqty jáne japyraqty aǵashtar men butalar egiledi. Jalpy uzyndyǵy 2,7 shaqyrymǵa jetetin sýarmaly sý qubyry tartylady», — dep atap ótti ákimdikten.
Sondaı -aq jaǵalaýǵa uzyndyǵy 4,3 shaqyrym bolatyn 196 jaryq baǵanasy ornatylady. Kelýshilerdiń jaılylyǵy úshin 135 oryndyq pen qoqys jáshigine qoıý josparda.
Basty maqsat — balalar men sport alańdary, jaıaý júrý joldary men ózen jaǵasynda demalý múmkindigi bar jańa qoǵamdyq keńistik qurý. Átkenshek, syrǵanaq jáne órmeleý sııaqty ashyq oıyn elementteri balalardyń motorıkasy men fızıkalyq belsendiligin arttyrady.
Balalarǵa arnalǵan qumsalǵyshtar men sý aımaqtaryn, sondaı-aq ata-analarǵa arnalǵan oryndyqtary men ústelderi bar demalys aımaǵyn qurý josparda.
Erekshe balalar úshin de oıyn alańdarynda ınklıýzıvti elementter qoıylatyn bolady.
Kópir jolyn qaıta quryp, jaıaý júrginshiler men velosıpedshilerge qaýipsizdik pen qoljetimdilik qamtamasyz etilmek. Trotýarlar men velosıped joldaryn ornatý qarastyrylǵan.
Bul joba «Qarǵaly» ózeniniń jaǵalaýyn qala shetindegi biregeı tabıǵı saıabaqqa aınaldyrady.
Qurylys jumystaryn 2024 jyldyń qarasha aıyna deıin aıaqtaý josparda bar.
«Almaty — bizdiń ortaq úıimiz» naýqany týraly barlyq aqparat almaty.kz saıtynda, Almaty ákimdiginiń áleýmettik jelilerinde ornalastyrylǵan. Sondaı-aq, veb-saıtqa qala boıynsha bannerlerde, plakattarda arnaıy ornalastyrylǵan QR-kod arqyly da kirýge bolady.
