Almatyda jańa úıdiń turǵyndary jóndeý jumystaryn bastaı almaı otyr: ákimdik ne deıdi
ALMATY. KAZINFORM – Almatyda jańadan salynǵan Buta Legend turǵyn úı kesheni tóńireginde daý kúsheıdi. Páter ıeleri tórt aıdan beri jóndeý jumystaryn bastaı almaı otyrǵanyna shaǵymdandy.
Áleýmettik jelidegi jazba avtorynyń aıtýynsha, turǵyndar kiltti qyrkúıek aıynda alǵanymen, tórt aıdan beri úıde kóptegen kemshilik anyqtalǵan jáne nysan qonystanýǵa tolyqqandy daıyn emes.
– 1 jeltoqsanǵa deıin úıde áli de jylytý júıesi qosylmaǵan. Bizge páterlerdi komfort+ dep satty, biraq is júzinde múldem olaı emes. Eń basty suraq – bul úı qalaı paıdalanýǵa berildi? - dep jazdy ol.
Almaty ákimdigi bul turǵyn úı keshenindegi jaǵdaıǵa qatysty resmı aqparat taratty.
Almatynyń qala qurylysyn baqylaý basqarmasy Buta Legend turǵyn úı keshenin salýǵa qatysy bar barlyq tarapqa – tapsyrys berýshi Buta Legend JShS, merdiger Buta Group JShS, avtorlyq qadaǵalaý júrgizýshi BNK ArhProekt JShS jáne tehnıkalyq qadaǵalaýshy «Ekspertnyı dom» JShS-ne jospardan tys tekseris júrgizdi.
Nátıjesinde nysanda kóriktendirý jáne kógaldandyrý jumystary aıaqtalmaǵany, 3, 5, 6, 7, 8, 9-bloktarda ishki árleý jumystary bitpegeni, lıftiler ornatylmaǵany, sondaı-aq jylý jáne ystyq sý júıeleri qosylmaǵany anyqtaldy.
– 2025 jyly 21 qazanda basqarma Buta Legend turǵyn úı keshenin salýǵa qatysqan barlyq tarapqa QR Ákimshilik quqyq buzýshylyq týraly kodeksiniń 318-baby boıynsha ákimshilik shara qoldandy, sondaı-aq tapsyrys berýshi men merdigerge atalǵan kemshilikterdi joıý boıynsha nusqama berildi, - delingen habarlamada.
Qazirgi ýaqytta ınjenerlik jeliler boıynsha barlyq qajetti daıyndyq aktisi alynǵan.
– Jylý, sý jáne elektrmen jabdyqtaý ınfraqurylymy qosylyp, qalypty rejımde jumys istep tur. Jedelsaty jabdyqtaryn ornatý jáne kóriktendirý boıynsha jumystar jalǵasyp jatyr, - dep habarlady ákimdiktiń baspasóz qyzmeti.
Ákimdik qazirgi ýaqytta turǵyndar páterine jóndeý jumystaryn kedergisiz bastaı alatynyn málimdedi.
Eske salaıyq, buǵan deıin almatylyqtar qandaı másele boıynsha jıi shaǵym túsiretinin jazǵanbyz.