Almatyda jańa úlgidegi, erekshe jataqhana paıdalanýǵa berildi
ASTANA. KAZINFORM – Oqý jyly qarsańynda Almatyda Narhoz ýnıversıtetiniń jańa Emen Student Housing jataqhanasynyń saltanatty ashylýy ótti. Stýdentter úıi 424 orynǵa arnalǵan jáne bilim alýshylardyń jaıly turýy úshin tolyqtaı jabdyqtalǵan.
Jataqhananyń ashylý saltanatyna QR Ǵylym jáne joǵary bilim mınıstri Saıasat Nurbek, memlekettik organ basshylary, sondaı-aq jumys berýshiler keńesiniń músheleri, ákimshilik, professorlyq-oqytýshylar quramy jáne ýnıversıtet stýdentteri qatysty.
«Búgin biz Prezıdent Qasym-Jomart Toqaevtyń stýdenttik jataqhanalar máselelerin sheshý jónindegi tapsyrmasynyń iske asyrylýyn kórip otyrmyz. Qazaqstanda árbir stýdent bilim alý úshin qolaıly jaǵdaıǵa ıe bolýy tıis. Másele tek oqý ǵımarattaryna ǵana emes, sonymen qatar alys aımaqtar men qalalardan kelgen stýdentterge arnalǵan oryndarǵa da qatysty. Qolaıly orta qurý bilim alýshy jastardyń ýájdemesi men áleýetin birneshe ese arttyrady, al Narhoz ýnıversıteti osyǵan baılanysty joǵary standartty belgileıdi», - dep atap ótti mınıstr.
Emen jańa formattaǵy jataqhanasy – ýnıversıtettiń ınfraqurylymyn keńeıtýge jáne jańartýǵa baǵyttalǵan iri áleýmettik bastamanyń mańyzdy bóligi. Jataqhana ataýy turaqtylyq pen tektilikti bildiredi. Emen aǵashtary jańa jataqhanada ósiriletin bolady. Bul ataý Narhozda burynnan qalyptasyp kelgen dástúrdi jalǵastyrýda: ýnıversıtet kampýsyn qaıta qurý aıasynda 60 jastaǵy talshyn aǵashy saqtaldy. Narhozdyń basqa jataqhanalary – «Alma» jáne «Terek» – óz aýmaǵyndaǵy kórnekti aǵashtardyń ataýlaryna ıe boldy.
Óz kezeginde Almaty qalasynyń ákimi Erbolat Dosaev mundaı nysandar qalanyń áleýmettik ahýalyn jaqsartatynyn aıtty.
«Stýdentter úıi» - bul Almaty kartasyndaǵy jańa nysan ǵana emes. Mundaı jaǵdaıda ár stýdent ózin úıdegideı sezinedi, sonymen birge ózi úshin jańa ortaǵa ońaı enip, sapaly bilim alyp, qalanyń damýyna óz úlesin qosa alady. Qurylys jeke qarajat esebinen júrgizilgenin atap ótkim keledi, bul jalpy ózin-ózi qamtamasyz etetin megapolıs úshin jaqsy tájirıbe», - dep aıtty qala ákimi.
«Emen» stýdentter úıi bir jyldan az ýaqyt ishinde Narhoz aktsıoneriniń qarajaty esebinen salyndy. Jataqhana jalpy aýdany 8700 m² quraıtyn úsh, bes jáne jeti qabatty ǵımarattar kesheninen quralǵan. Stýdentter úıindegi bólmeler panoramalyq terezeler, jıhaz, tehnıka, klımattyq baqylaý jáne avtomatty órt sóndirý júıelerimen qamtylǵan, sondaı-aq jeke sanıtarlyq toraptarmen jabdyqtalǵan. Bólmege sandyq kod qulyptary nemese saýsaq izderin skanerleý arqyly kirýge bolady. Zamanaýı qajettilikterdiń barlyǵy qamtylǵan stýdentterdiń qolaıly jaǵdaı turýlary úshin jańa baspana qurylyp otyr.
Ár qabatta as úıler, ashanalar men kovorkıngter bar, al birinshi qabatta dúken, kir jýatyn oryn, barbershop, kofehana, dárihana jáne medıtsınalyq keńse ornalasqan. Wi-Fi jataqhananyń barlyq aýmaǵynda qoljetimdi. Abattandyrý jáne kógaldandyrý barysynda 100-den astam butalar men aǵashtar otyrǵyzyldy, sonymen qatar workout aımaqtary jabdyqtalǵan. Jataqhananyń tóbesinde aýdany 400 m² quraıtyn jasyl terrasa salynǵan.
Aıta ketý kerek, jańa jataqhanada oryndardy bólý QR Ǵylym jáne joǵary bilim mınıstrligi bekitken erejelerge sáıkes júrgiziledi. Bilim berý granttary boıynsha da, aqyly negizde de oqıtyn Narhoz ýnıversıtetiniń qaladan tys jáne sheteldik stýdentteri úmitker bola alady. Qazirgi ýaqytta joǵary oqý ornynyń 4 stýdentter úıi bar.
