Almatyda jańa taý shańǵysy kýrorty paıda bolady

ASTANA. KAZINFORM — Almatyda «Shymbulaq» kýrortynan bólek, taǵy bir taý shańǵysy alańy ashylady. Bul týraly Týrızm jáne sport vıtse-mınıstri Erjan Erkinbaev málim etti. 

— Memleket basshysynyń tapsyrmasy boıynsha biz Almaty taý klasterin damytý jónindegi keshendi jospardy qabyldaý baǵytynda jumys istep jatyrmyz. Jospar jańa taý shańǵysy kýrortyn qurýdy kózdeıdi. Biz bul saladaǵy suranysty kórip otyrmyz, óıtkeni Almaty taýlarynyń aınalasynda óte perspektıvaly naryq bar, — dedi Erjan Erkinbaev Senat qabyrǵasynda ótken is-sharadan keıin BAQ ókilderiniń saýalyna jaýap bere turyp.

Mınıstr orynbasarynyń málimetinshe, taý týrısi kúndelikti orta eseppen 250 AQSh dollar jumsaıdy.

— Taý shańǵysy týrısi jaǵajaı týrısine qaraǵanda bes ese kóp qarajat jumsaıdy. Bul sheteldik týrısterge usyna alatyn erekshe qyzmet. Sondyqtan bul baǵyttyń áleýetin bári jaqsy túsinedi. Aldaǵy jyldary Almatyda júzdegen shaqyrymdyq taý shańǵysy trassalary paıda bolady. Bul álemdik taý shańǵysy týrızminiń kartasynda jańa jáne óte tartymdy oryndy qalyptastyrady. Óıtkeni elimizde álemdegi eń úzdik taý shańǵysy kýrorttarynyń qataryna ený úshin barlyq klımattyq jaǵdaı bar, — deıdi ol.

Aıta ketsek, 2025 jyly Almatyda týrızmdi damytý úshin ne isteletini týraly habarlaǵan bolatynbyz. 

Eske salsaq, byltyr Qazaqstanda týrızmge salynǵan ınvestıtsııa kólemi 20,3%-ǵa artty.