Almatyda jańa stantsııa salý jobasy júzege asyp jatyr

Almatyda BAQ ókilderimen kezdesken Energetıka mınıstri Almasadam Sátqalıev megapolıstegi elektr stansalaryn jańartý jáne otynmen qamtamasyz etý jumystary jaıynda aıtty, dep habarlaıdy Kazinform. 

Mınıstrdiń sózinshe, búgingi kúni qalanyń elektr jáne jylý energııasyna qajettiligin Almaty JEO-1, JEO-2, JEO-3 jylý elektr ortalyqtary, Qapshaǵaı sý elektr stantsııasy, Kaskad sý elektr stantsııasy ótep otyr.

«Úsh JEO-nyń barlyǵynda qazirgi tańda jańǵyrtý jáne gazǵa kóshirý jumystary júrgizilip jatyr. Atap aıtqanda, Almaty JEO-1-de aýystyrý jobasy jalpy qýaty 225 MVt bolatyn bý-gaz qondyrǵylaryn ornatý arqyly stantsııany keńeıtýdi kózdeıdi. Jobany iske asyrý 2025-2028 jyldarǵa josparlanǵan. Almaty JEO-2-de qýattylyǵy 557 MVt-qa deıingi bý-gaz qondyrǵysy bazasynda qorshaǵan ortaǵa áserdi barynsha azaıta otyryp, stantsııany jańǵyrtý jáne jańa stantsııa salý jobasy júzege asyp jatyr. Almaty JEO-3-ti aýystyrý jobasy jalpy qýaty 545 MVt bý-gaz qondyrǵylaryn ornatýmen stantsııany keńeıtýdi kózdeıdi», - dep atap ótti Almasadam Sátqalıev.

Ol sondaı-aq 2026 jyldan bastap JEO-2 men JEO-3-ti gazǵa tolyq aýystyrý jumystary kezeń-kezeńimen bastalatynyn aıtty.