Almatyda jańa stadıonnyń bolashaq beınesi kórsetildi
ALMATY. KAZINFORM – Almatyda 45 myń kórermenge arnalǵan stadıon qurylysy júrip jatyr.
Almaty qalasyn damytý ortalyǵy qalada boı kóteretin stadıonnyń ishki jáne syrtqy beınesimen bólisti. Megapolıstiń basty alańy bolashaqta qandaı bolatyny beınejazbada kórsetilgen.
Elimizdiń ońtústik astanasynda jańa alań salynatyny byltyr belgili boldy. Bastapqyda Almaty ákimdigi 35 myńdyq stadıon salý josparlanǵanyn habarlady. Alaıda keıin turǵyndar men qoǵam usynysy eskerilip, alań syıymdylyǵy 45 myń orynǵa ulǵaıtyldy.
Nysan Qulja jáne Talǵar tas joldarynyń arasynda boı kóteredi. Jobany iske asyrýǵa bólingen aýmaqtyń jalpy kólemi shamamen 32 gektar. Ol ÝEFA-nyń IV sanattaǵy talaptaryna saı bolmaq. Bul halyqaralyq deńgeıdegi fýtbol matchtary men iri sporttyq is-sharalardy ótkizýge múmkindik beredi.
Joba aıasynda negizgi fýtbol arenasymen qatar jattyǵý alańdary, sportshylar men komandalarǵa arnalǵan zamanaýı ınfraqurylym, jankúıerlerge arnalǵan aımaq, qaýipsizdik júıeleri jáne irgeles aýmaqty keshendi kóriktendirý jumystary qarastyrylǵan. Sondaı-aq myńnan astam kólikke arnalǵan avtoturaq ta salynady.
Odan bólek aldaǵy jyldary stadıon mańynda metro beketi ashylýy múmkin. Ol «Jibek joly» beketinen Almaty áýejaıyna deıingi ekinshi metro jelisiniń bir bóligi bolady.
Buǵan deıin Almaty ákiminiń orynbasary Beıbit Shahanov stadıon salynyp jatqan ýchaske 10 baldyq aımaq bolǵandyqtan, alań jobasy Qazaq qurylys jáne sáýlet ǵylymı-zertteý jáne jobalaý ınstıtýtymen birlese pysyqtalyp jatqanyn aıtty.
Eske salaıyq, jańa stadıonnyń qurylysyn 2028 jyldyń naýryzynda aıaqtaý josparlanǵan.
