Almatydaǵy jańa stadıonda oryn sany 35 myńnan kóbeıtile me

ALMATY. KAZINFORM – Almatynyń jańa stadıonynda shynaıy shóp jabyny bolady.

Almatyda jańa fýtbol alańy salynatyny týraly jańalyq qoǵamda keńinen talqyǵa tústi. Sport sarapshylary men fýtbol jankúıerleri áleýmettik jelide 2,2 mln turǵyny bar qalaǵa 35 myńdyq stadıon shaǵyn bolatynyn aıtyp, alań syıymdylyǵyn kóbeıtýdi usyndy.

Osyǵan oraı, Kazinform agenttigi qalalyq qurylys basqarmasyna «jańa stadıondaǵy oryn sany 35 myńnan kóp bolýy múmkin be?» dep saýal joldady.

- Qazirgi ýaqytta bekitilgen jobalaýǵa arnalǵan tapsyrmaǵa jáne aldyn ala ázirlengen eskızdik jobaǵa sáıkes, jańa stadıonnyń syıymdylyǵy 35 000 oryn bolyp belgilengen, - delingen basqarma jaýabynda.

Sondaı-aq basqarma qurylys jumysynyń merzimi áli naqtylanbaǵanyn atap ótti. 

— Jobalaý-smetalyq qujattamany ázirleý boıynsha merdiger uıymmen kelisimshart osy jyldyń qarasha aıyna deıin jasalatyn bolady. Jobalaý jumystarynyń kólemi men merzimi atalǵan kelisimshart sheńberinde júzege asyrylady. Jobada shynaıy tabıǵı shóp jabyny bar fýtbol alańy qarastyrylǵan, - delingen jaýapta. 

Vedomstvo jańa stadıon ÝEFA-nyń 4-sanat talaptaryna saı etip salynatynyn málimdedi. 

Sondaı-aq jobalyq sheshimge sáıkes, stadıonǵa kelýshiler úshin 1 myńnan astam kólikke arnalǵan avtoturaq oryny josparlanǵan. 

Eske salaıyq, Almatyda jańa stadıon Qulja men Talǵar tas joldarynyń arasynda, 15 gektar jerde salynatynyn jazǵanbyz.

Sondaı-aq bıyl jańa stadıon qurylysyna baılanysty alǵashqy jumystar bastalatynyn jazǵan edik.