Almatyda jańa metro jelisine jer alynyp jatyr ma

ALMATY. KAZINFORM – Almatyda bıyl memleket qajettiligine 1 myńnan astam jer ýchaskesi men nysan alynady.

Byltyr Almaty qalasy qarjy basqarmasynyń basshysy Qanat Sýhambekov 126 jer ýchaskesin satyp alý úshin 9 mlrd teńge bólinetinin aıtty. Ol alynatyn ýchaskeler qoldanystaǵy kóshelerdi keńeıtý jáne metro salýǵa qajet ekenin atap ótti.

Osy oraıda Kazinform tilshisi qala basshylyǵyna saýal joldap, metronyń jańa jelisi úshin jer alý jumystary qalaı júrip jatqanyn anyqtady.

Almaty qalasy Jer qatynastary basqarmasynyń jaýabyna sáıkes, 2024 jyly qalada memleket muqtajy úshin 452 jer ýchaskesi men jyljymaıtyn múlik satyp alynǵan. Olar bilim berý, densaýlyq saqtaý, ınjenerlik jáne kólik ınfraqurylymy nysandaryn salý, sondaı-aq abattandyrý maqsatynda alynǵan.

Al bıyl memleket qajettiligi úshin 1235 nysandy (jer telimi) satyp alý josparlanǵan. Olardyń ishinde búginge deıin 248 múlik alynyp qoıǵan. Bul jer ýchaskeleri kólik jáne jol ınfraqurylymyn damytýǵa, ınjenerlik ınfraqurylymǵa, áleýmettik nysandarǵa – mektepter, emhanalar, balabaqshalar, saıabaqtar jáne t.b. nysandarǵa, sondaı-aq kóshkin qaýpi bar aýmaqtardy joıý maqsatynda alynǵan. Biraq olardyń qatarynda metro qurylysy joq.

- Almaty qalasynda metronyń jańa jelisiniń qurylysy boıynsha (áýejaıǵa deıin) naqty aqparattyń bolmaýyna jáne jergilikti atqarýshy organnyń jer ýchaskelerin alyp qoıý boıynsha tıisti qaýlynyń qabyldanbaýyna baılanysty naqty jumystar bastalǵan joq, - delingen Jer qatynastary basqarmasynyń jaýabynda.

Eske salaıyq, Almatyda qala men memleket qajettiligi úshin jer telimin satyp alý jumystary jyldam ári ońaı óte bermeıdi. Mysaly, byltyr ashylýy qajet bolǵan Saın kóshesiniń jańa bóliginde 1 úı úshin jumystar aıaqtalmaı toqtap qaldy.

Almaty ákimdigi aldaǵy jyldary metropolıtenniń ekinshi jelisin «Jibek joly» beketinen áýejaıǵa deıin, al úshinshi jelisin «Saıran» beketinen «Baraholka» bazary arqyly Alataý qalasyna deıin salýdy josparlap otyr.