Almatyda jańa metro qurylysyna baılanysty Alataý dańǵyly jabylady
ALMATY. KAZINFORM - Almatyda metronyń birinshi jelisiniń úshinshi kezeńin salý jobasy aıasynda №1 stantsııa qurylysy júrip jatqan aýmaqta kólik qozǵalysynyń syzbasy ózgeredi.
Qalalyq kólik ınfraqurylymyn damytý basqarmasynyń málimetinshe, №1 beket Alataý dańǵylynyń boıynda, Abaı dańǵylynan soltústikke qaraı ornalasady.
Osyǵan baılanysty 13 qarashadan bastap qurylys aıaqtalǵanǵa deıin Alataý dańǵylynyń Abaı dańǵylynan Ulyqbek kóshesine deıingi bóliginde kólik qozǵalysy shekteledi. Bul aýmaqtan jańadan salynǵan aınalma jol arqyly ótýge bolady.
Ákimdik qala turǵyndary men qonaqtarynan jol júrý baǵytyn aldyn ala josparlap, ornatylǵan jol belgileriniń talaptaryn saqtaýdy suraıdy.
Aıta ketsek, metronyń birinshi jelisiniń úshinshi kezeginiń jobasy aıasynda uzyndyǵy shamamen 5,3 shaqyrym bolatyn aralyq tonnelder men úsh beket salý kózdelgen.
№2 beket Alataý dańǵylynyń boıynda, bolashaqta salynatyn Tóle bı kóshesimen qıylysatyn aýmaqta ornalasady. Al №3 beketti «Barlyq» bazarynyń aýmaǵynda salý josparlanyp otyr.
Bul jerde metrony avtobýs baǵyttarymen jáne jeńil relsti kólik júıesimen (LRT) baılanystyratyn biryńǵaı kólik-aýystyrý toraby qurylady. Sondaı-aq jeńil avtokólikterge arnalǵan turaq salý qarastyrylǵan.
Eske salaıyq, Almatyda «Qalqaman» metro beketi 1 jeltoqsanǵa deıin ashylatyny aıtyldy.