Almatyda jańa medıtsınalyq nysandar men tsıfrlyq tehnologııalar engizilip jatyr
ALMATY. KAZINFORM – Almatyda qalanyń densaýlyq saqtaý júıesiniń osy jyldyń 9 aıyndaǵy jumys nátıjelerin talqylaýǵa arnalǵan alqa otyrysy ótti. Jıynǵa qala ákiminiń orynbasary Nurlan Ábdirahym tóraǵalyq etti. Bul týraly Almaty qalasy ákimdiginiń baspasóz qyzmeti habarlady.
Qalalyq qoǵamdyq densaýlyq saqtaý basqarmasynyń basshysy Marat Pashımov atqarylǵan jumystar týraly esep berdi.
Otyrysta sondaı-aq, «Áleýmettik medıtsınalyq saqtandyrý qory» Jeke aktsıonerlik qoǵamy Almaty qalalyq fılıalynyń dırektory Іlııas Muhamedjan, Almaty qalasy boıynsha Sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly jáne QR DSM Medıtsınalyq jáne farmatsevtıkalyq baqylaý komıtetiniń Almaty qalasy boıynsha departamentiniń basshysy Damır Daýletbaev baıandama jasady.
Qalada densaýlyq kórsetkishteri boıynsha turaqty oń dınamıka baıqalady. Jalpy adam ólimi 0,75%-ǵa tómendep, respýblıkalyq ortasha deńgeıden 21%-ǵa tómen kórsetkishti saqtap otyr.
Bıylǵy 9 aıda Almatyda ana ólimi tirkelgen joq, al náreste ólimi 21,8%-ǵa tómendedi. Bul el boıynsha eń jaqsy kórsetkishterdiń biri.
Qan aınalym júıesi aýrýlarynan (–4,9%), onkologııalyq aýrýlardan (–13%), týberkýlezden (shamamen eki esege), jaraqattar men jazataıym jaǵdaıdan (–11%) bolatyn ólim-jitim de tómendep keledi.
Almatynyń medıtsına uıymdarynda 18,5 myńnan astam qyzmetker eńbek etedi, onyń ishinde 5 myńnan astam dáriger jáne 10 myńnan astam orta býyn mamandar. Dárigerlermen qamtylý deńgeıi — 91,5%, orta medıtsınalyq qyzmetkermen qamtylý — 90,5%.
Jyl saıyn qala medıtsına uıymdaryna 400-den astam jas maman jumysqa ornalasady. Bul kadr tapshylyǵyn kezeń-kezeńmen azaıtýǵa jáne júıeniń kásibı áleýetin nyǵaıtýǵa yqpal etedi.
Almatyda medıtsınalyq maman tapshylyǵyn tómendetý boıynsha sharalar júzege asyrylyp keledi. 2025 jyly qaladaǵy medıtsınalyq joǵary oqý oryndarynda 319 rezıdent bilim alyp júr, onyń 124-i bıyl túsken. 2024–2025 oqý jylyna ákimdiktiń memlekettik tapsyrysy boıynsha tehnıkalyq jáne kásiptik bilim berý baǵdarlamalaryna 1 216 stýdent qabyldanǵan.
Almatyda 2030 jylǵa deıin densaýlyq saqtaý ınfraqurylymyn jańǵyrtýdyń kezeńdik jospary iske asýda. Eki alǵashqy medıtsınalyq-sanıtarlyq kómek ortalyǵy, jedel járdem qosalqy stansasy jáne emhana qurylysy aıaqtalýǵa jaqyn. Sondaı-aq, № 4 QKA, № 7 QKA jáne № 1 perzenthana jóndelip jatyr.
2026 jyldan bastap kópsalaly aýrýhanalar, balalar klınıkalyq ortalyqtary, onkoortalyq jáne perınataldyq ortalyqty qamtıtyn toǵyz jańa nysannyń qurylysy josparlanǵan.
Medıtsınalyq tehnıkamen qamtamasyz etilý deńgeıi 93,9%.
Bıyl qala medıtsına uıymdary úshin shamamen 3000 zamanaýı jabdyq satyp alý kózdelgen.
2025 jyly telemedıtsına, jasandy ıntellekt jáne qashyqtan densaýlyq monıtorıngin biriktiretin Almaty Digital Medical Center (ADMC) tsıfrlyq medıtsına ortalyǵy iske qosyldy. Patsıentterdi Face ID arqyly sáıkestendirý, elektrondy aýrýhana paraǵy, anyqtamalar jáne t. b. engizildi.
Qashyqtan kórsetiletin medıtsınalyq qyzmet sany 236 myńǵa jetti. Onkoortalyqta hımıopreparattardy robottandyrylǵan daıyndaý júıesi iske qosyldy, al emhanalarda jasandy ıntellekt elementteri bar daýys kómekshileri jumys isteı bastady.
Almaty medıtsınalyq týrızm ortalyǵy retindegi pozıtsııasyn da nyǵaıtyp keledi. 2025 jyldyń 9 aıynda qala statsıonarlarynda TMD elderinen, Reseı, Ózbekstan jáne Qyrǵyzstannan kelgen 279 sheteldik naýqas emdeldi. Eń suranysqa ıe baǵyttar — perınatologııa, onkologııa, oftalmologııa, hırýrgııa jáne ýrologııa.
Qaladaǵy 29 medıtsınalyq uıym 59 baǵyt boıynsha joǵary tehnologııalyq kómek kórsetedi. Bul ótken jylǵa qaraǵanda 7%-ǵa artyq. Mundaı kómekti 4 800-ge jýyq patsıent aldy.
Negizgi baǵyttar — kardıohırýrgııa, neırohırýrgııa, akýsherlik-gınekologııalyq kómek, EKO jáne kardıoverter-defıbrıllıatorlar ımplantatsııasy.
Qorytyndy sózinde Almaty qalasy ákiminiń orynbasary Nurlan Ábidrahym qalanyń densaýlyq saqtaý júıesiniń basty baǵyttar boıynsha turaqty damý jáne oń nátıje kórsetip otyrǵanyn atap ótti. Ol medıtsınalyq kómektiń sapasy men qoljetimdiligin arttyrý, bıýdjet qarajatyn tıimdi paıdalaný, tsıfrlyq tehnologııa engizý jáne bilikti kadrlardy daıarlaý jumystaryn jalǵastyrýdyń mańyzyn atap ótti.
Ákim orynbasarynyń aıtýynsha, aýrýlardy erte aldyn alý, ınfraqurylymdy damytý jáne ulttyq ındıkatorlardyń tolyq oryndalýyn qamtamasyz etýge erekshe nazar aýdarý qajet.