Almatyda jańa Konstıtýtsııanyń el men qala damýyna qosar úlesi talqylandy
ALMATY. KAZINFORM – Almatyda qala ákimi Darhan Satybaldynyń qatysýymen Qazaqstan Respýblıkasynyń jańa Konstıtýtsııasynyń kúshine enýine arnalǵan «Jańa Konstıtýtsııa — jańa serpin» atty dóńgelek ústel ótti.
Іs-sharaǵa ǵylymı jáne sarapshylyq qaýymdastyq ókilderi, shyǵarmashylyq zııaly qaýym, máslıhat depýtattary, Qoǵamdyq keńes músheleri, ardagerler uıymdarynyń jáne memlekettik organdardyń ókilderi qatysty.
Jıyndy ashqan Darhan Satybaldy jańartylǵan Ata zańnyń kúshine enýi Qazaqstannyń zań ústemdigine, ádilettilikke, ashyq memlekettik basqarýǵa jáne joǵary azamattyq jaýapkershilikke negizdelgen jańa damý kezeńine qadam basqanyn bildiretinin aıtty.
Qala ákiminiń aıtýynsha, jańa Konstıtýtsııa quqyqtyq normalardy bekitip qana qoımaı, adam quqyǵy men bostandyǵyn qorǵaý, tıimdi memlekettik basqarý qalyptastyrý jáne qoǵamdyq jaýapkershilikti basty qundylyq retinde aıqyndaıtyn memlekettiń jańa damý tujyrymdamasyn qalyptastyrady.
— Memleket basshysy Qasym-Jomart Kemeluly Toqaev atap ótkendeı, jańa Konstıtýtsııa elimizdiń uzaq merzimdi damýynyń berik quqyqtyq negizin qalyptastyryp, jańa qoǵamdyq kelisimniń ózegine aınalady. Sondyqtan onyń búgin zańdy kúshine enýi — Ádiletti jáne Progressıvti Qazaqstandy qurý jolyndaǵy reformalardyń jańa kezeńge ótkeniniń aıqyn kórinisi, — dedi Darhan Satybaldy.
Ákim Qazaqstannyń eń iri qalasy, ǵylym, bilim, ınnovatsııa, mádenıet jáne ekonomıka ortalyǵy sanalatyn Almatyǵa konstıtýtsııalyq qaǵıdattardy is júzinde júzege asyrýda erekshe jaýapkershilik júkteletinin jetkizdi. Onyń aıtýynsha, Almatyny 2030 jylǵa deıin damytý strategııasy jańa Konstıtýtsııanyń negizgi qaǵıdalarymen úndesip, jaıly, qaýipsiz, ekologııalyq taza ári básekege qabiletti megapolıs qalyptastyrýǵa baǵyttalǵan.
Darhan Satybaldy zamanaýı kólik ınfraqurylymyn damytý, qalany polıtsentrlik model boıynsha órkendetý, tsıfrlandyrý, Almaty AI Park jobasyn qurý, Smart City tehnologııasyn engizý, ekologııalyq jańǵyrtý, qoǵamdyq keńistikterdi damytý jáne «Taza Qazaqstan» bastamasyn iske asyrý turǵyndardyń ómir sapasyn arttyrýǵa baǵyttalǵan konstıtýtsııalyq qaǵıdattardyń naqty kórinisi ekenin atap ótti.
Dóńgelek ústel barysynda qatysýshylar jańa Konstıtýtsııa qaǵıdattaryn memlekettik basqarý júıesinde tıimdi iske asyrý, quqyqtyq mádenıetti nyǵaıtý, azamattyq jaýapkershilikti arttyrý, sondaı-aq eldiń odan ári damýyna ǵylymı jáne sarapshylyq qaýymdastyqtyń qosar úlesi jóninde pikir almasty.
Kezdesý sońynda qatysýshylar jańa Konstıtýtsııa Qazaqstannyń ornyqty damýyna, qoǵamdyq kelisim men zań ústemdigin nyǵaıtýǵa, sonymen birge ádiletti, ashyq ári tıimdi memleket qalyptastyrýǵa berik quqyqtyq negiz bolatynyn erekshe atap ótti.
