Almatyda jańa kongress-ortalyqtyń qurylysy nege bastalmaı tur
ALMATY. KAZINFORM – Almaty ákimi Erbolat Dosaev Medeý aýdanynyń turǵyndarymen kezdesti.
Kezdesý barysynda turǵyn Medeý aýdanynda qurylysy josparlanǵan kongress-ortalyqtyń qurylysy qanshalyqty zańdy ekenin surady.
- Kongress-ortalyq memleket ıeliginde bolady. Jergilikti bıýdjet qarajaty ınjenerlik jeliler men abattandyrý jumystaryna jumsalady. Sonymen qatar áleýmettik jaýapkershilik sheńberinde jeke ınvestorlardyń qarajaty tartylady. Biz tek zań júzinde jumys isteıtin bolamyz. Ondaǵy jerdi belgilengen baǵamen satyp alamyz. Oǵan kelispegen adamdardyń sotqa shaǵymdanýǵa quqyǵy bar. Biz 13 jer ıesimen kelisimshart jasasyp qoıdyq. Bastysy joba úshin qajetti jerdiń basym bóligi qalanyń ıeliginde. Tek jobany tolyq iske asyrý úshin qosymsha aýmaqty satyp alý qajet. Sot qandaı sheshim shyǵarsa, soǵan qaraı biz jer ıelerine tólem jasaımyz. Eshqandaı zań normalaryn buzbadyq, bul shynymen memleket qajettiligi, - dedi qala ákimi.
Sondaı-aq Erbolat Dosaev kongress-ortalyq úshin alynatyn aýmaqta eshqandaı kommertsııalyq nysan salynbaıtynyn atap ótti.
- Qalada kongress-ortalyq joq, sondyqtan biz ony salamyz. Al munda kommertsııalyq nysan salynady degen alyp-qashpa sózder shyndyqqa janaspaıdy. Keńes odaǵy kezinen beri Almatyda Respýblıka saraıynan basqa nysandar salynbaǵan. Ekinshi, onda 21 gekter aýmaǵynda saıabaq bolady, óıtkeni qalanyń joǵary jaǵynda saıabaqtar jetispeıdi, – dedi ol.
Eske salaıyq, 2019 jyly «Almaty qalasyn damytý 50 draıver- jobasy» aıasynda qalada zamanaýı kongress-ortalyq salynatyny habarlanǵan edi.