Almatyda jańa «Keleshek mektepteri» oqýshylardy qabyldaýǵa daıyn ba
ALMATY. KAZINFORM — Almatyda 1 qyrkúıekten bastap jańa bilim nysandary qoldanysqa beriledi.
Jańa oqý jylynda megapolıste 7 «Keleshek mektebi» jáne qala ákimdiginiń tapsyrysymen salynǵan «Zerdeli» shaǵyn aýdanyndaǵy 550 oryndyq mektep ashylady. Bul týraly Almaty qalasy Bilim basqarmasy basshysynyń orynbasary Gúlnur Kárimǵajy aıtty.
Onyń sózinshe, qalada 29 myń oqýshy ornyna áli de tapshylyq bar. Biraq bul san jańa bilim nysandardyń esebinen azaıatyn bolady.
— 1 qyrkúıekten bastap «Keleshek mektepteri», onyń ishinde Túrksib aýdanyndaǵy № 228 jáne № 229 mektepter oqýshylar úshin esigin ashady. Qazirgi tańda ustazdar men oqýshylardy qabyldaý júrip jatyr. 1-synypqa boljam boıynsha bıyl 31 myń bala qabyldaımyz. 31 tamyzǵa deıin qabyldaý jalǵasady, — dedi ol.
Sonymen qatar basqarma ókili Almatyda úsh aýysymdy mektepter joq ekenin atap ótti.
Onyń aıtýynsha, «Keleshek mektepteriniń» ózge bilim mekemelerinen basty ereksheligi — aýmaǵynyń úlkendigi men jabdyqtalý deńgeıi.
— Olardyń aýmaǵy tıptik mektepterge qaraǵanda 15-20%-ǵa ulǵaıǵan. Sonymen qatar kabınetterdiń 40%-y tehnıkalyq jaǵynan jabdyqtalǵan. Bul — robototehnıka, fızıka, hımııa, jaratylystaný baǵytyndaǵy kabınetter, — dedi Gúlnur Kárimǵajy.
Sondaı-aq Almaty qalasynyń Bilim basqarmasy № 228 jáne № 229 mektepterdiń jańa oqý jyly aldyndaǵy daıyndyǵy kórsetti. Eki bilim ordasynyń árqaısysy 2 myń oqýshyny qabyldaýǵa qaýqarly. Oqýshylar munda 1 aýysymda bilim alatyn bolady.
Atalǵan mektepterde oqý pánderine arnalǵan kabınetterden bólek tigin mashınalary, arnaıy qural-jabdyqtar qoıylǵan erekshe synyptar da bar. Atap aıtqanda, robototehnıka, tehnologııa synyptary, zerthana men vızýaldy óner kabıneti jáne t. b.
Odan bólek «Keleshek mektepteriniń» árqaısysynda májilis zaly, 450 orynǵa ashana jáne 4 sport zal qarastyrylǵan. Eki sport keńistigi bastaýysh synyptarǵa, qalǵan ekeýi 5-11 synyp oqýshylaryna arnalǵan. Ár sport zalda basketbol, voleıbol, ulttyq sport, ústel tennısi, sporttyq gımnastıka, fýtbolǵa arnalǵan jabdyqtar alynǵan.
— Mekteptiń jobalyq qýattylyǵy 2000 balaǵa arnalǵan. Qazirgi tańda 1 myńǵa jýyq bala jınaqtaldy. 1 qyrkúıek — Bilim kúnine oraı mektebimizdiń ashylý saltanatyn ótkizýge tolyqtaı daıynbyz. Sonymen qatar mektebimizge balalardy tasymaldaıtyn 14 avtobýs bólinip otyr. Olar shalǵaı aýdandardan mektebimizge kelip oqıtyn oqýshylardy tasymaldaıtyn bolady, — dedi № 229 mekteptiń dırektory Alma Batyrhanova.
Sonymen qatar vedomstvo «Mektep avtobýsy» jobasynyń jumysyn jeke tanystyryp ótti. Gúlnur Kárimǵajynyń aıtýynsha, bıyl oqýshylardy tasymaldaıtyn avtobýstar sany azaıǵan.
— Osy jańa 8 mekteptiń ashylýy arqasynda qalada avtobýstardyń sany ótken jylǵy 287-den qazir 250-ge qysqardy. Sebebi jańadan ashylǵan mektepter balalarǵa qolaıly jaǵdaı jasap otyr. Oqýshylardy alysqa tasymaldaý qajet emes, úıleriniń qasynan oqýǵa bara alady, — dedi ol.
Eske salaıyq, keıingi bes jylda elimizde 1120 mektep salyndy.
