Almatyda jańa dene shynyqtyrý-saýyqtyrý keshenin salý kózdelip otyr
ASTANA. KAZINFORM - «Memsaraptama» RMK «Almaty qalasy, Alataý aýdany, Saıaly shaǵynaýdanynda dene shynyqtyrý-saýyqtyrý keshenin salý» jobasyna oń qorytyndy berdi, dep habarlaıdy QR Ónerkásip jáne qurylys mınıstrliginiń baspasóz qyzmeti.
Baspasóz qyzmetiniń málimetterine qaraǵanda, joba qalanyń sporttyq ınfraqurylymyn damytýǵa jáne turǵyndardyń buqaralyq sport jáne dene shynyqtyrýmen aınalysýyna zaman talabyna saı jaǵdaı jasaýǵa baǵyttalǵan.
Nysandy iske asyrý jurtshylyqtyń sportqa qatysty qyzmetterge qoljetimdiligin arttyryp, Alataý aýdany turǵyndary arasynda salaýatty ómir saltyn nasıhattaýǵa yqpal etedi.
Jobaǵa sáıkes, keshen quramynda ártúrli sport túrlerine arnalǵan zaldar bolady: sport jáne kórkem gımnastıka zaldary – árqaısysy 80 orynnan; karate (taekvondo), boks, grek-rım jáne erkin kúres, dzıýdo zaldary – árqaısysy 34 orynnan, sondaı-aq 41 orynǵa arnalǵan ákimshilik úı-jaılar kózdelgen. Atalǵan úı-jaılardyń jalpy syıymdylyǵy 473 oryndy quraıdy, qosymsha 136 kórermenge arnalǵan oryn qarastyrylǵan.
Sondaı-aq 112 orynǵa arnalǵan sý sporty túrleri zaly jáne 204 kórermenge arnalǵan trıbýnalar jobalanǵan.
Dene shynyqtyrý-saýyqtyrý kesheni bir aýysymda 408 adamdy qabyldaı alady, al bir mezgildegi syıymdylyǵy – 821 adam.
Jobanyń tapsyrys berýshisi — «Almaty qalalyq qurylys basqarmasy» KMM.
Bas jobalaýshy — «KAPREMPROEKT» JShS.
Osyǵan deıin Almaty oblysynda qaıtarylǵan aktıvter esebinen 1,1 mlrd teńgege sport kesheni salynatyny týraly jazdyq.
