Almatyda jańa Belsendi uzaq ómir súrý ortalyqtary ashyldy
ALMATY. KAZINFORM – Almatynyń Naýryzbaı aýdanynda Belsendi uzaq ómir súrý ortalyǵynyń jańa eki nysany ashyldy.
Almaty ákimdiginiń málimetinshe, Naýryzbaı aýdanynda zeınetkerler sany 2014 jylmen salystyrǵanda 2,8 ese ósken. Qazir aýdandaǵy qart adamdar sany 15,2 myńnan asady.
Sondyqtan jańa ortalyqtardyń biri – «Shuǵyla» shaǵyn aýdanynda ashyldy. Onda arnaıy jasalǵan baǵdarlama boıynsha qart adamdar psıhologııalyq jáne túrli dáristen ótedi. Egde jandar skandınavııalyq serýendeýge birge shyǵady, horeografııaǵa, túrli trenıngterge qatysady. Til kýrstary, ústel tennısi, dombyra, toǵyzqumalaq sabaqtary bar.
Ekinshi ortalyq «Qalqaman-2» shaǵyn aýdany Áshimov kóshesi, 253 mekenjaıynda ornalasqan. Bul ortalyqtyń baǵdarlamasy boıynsha dene shynyqtyrýǵa, shyǵarmashylyqqa, áleýmettik qoldaýǵa, mádenı murany saqtaýǵa erekshe nazar aýdarylady. Usynylatyn sabaqtardyń arasynda ıoga, horeografııa, zańgerlik jáne psıhologııalyq kómek, IT-saýattylyq, este saqtaýdy nyǵaıtý, bı, keskindeme, qolóner, vokal, akterlik sheberlik, ulttyq taǵam daıyndaý, dombyra tartý, túrli mýzykalyq janrlar bar.
- Jańadan ashylǵan eki Belsendi uzaq ómir súrý ortalyǵy egde jastaǵy jandardyń bos ýaqytyn tıimdi ótkizýge, ómir súrý sapasyn jaqsartýǵa, densaýlyǵyn nyǵaıtýǵa yqpal etedi, - dep habarlady Naýryzbaı aýdany ákimdigi.
Jalpy Almatyda qazirgi ýaqytta 19 Belsendi uzaq ómir súrý ortalyǵy jumys isteıdi.
Eske salaıyq, Astanadaǵy Belsendi uzaq ómir súrý ortalyǵynda kúzgi saýyqtyrý maýsymy ashyldy.