Almatyda jańa aıaldama salýǵa qalaı ótinish berýge bolady

ALMATY. KAZINFORM — Almatyda jolaýshylar men qoǵamdyq kólikke arnalǵan 2 myńnan astam aıaldama kesheni bar. 

Jol ınfraqurylymyn damytý basqarmasynyń málimetinshe, bıyl megapolıste memlekettik bıýdjet esebinen 50 jańa aıaldama salyndy. Al jeke ınvestorlar 25-ten astam aıaldamany jańartty. Qazirgi ýaqytta Almatyda 2261 qoǵamdyq kólik aıaldamasy bar.

Degenmen, áli de qalanyń keı tustarynda, ásirese, keıinnen qosylǵan aýdandarda aıaldama jetispeýshiligi men olardyń qashyqtyǵyna qatysty másele bar. Sondyqtan Kazinform agenttigi jaýapty vedomstvodan jańa aıaldama salýǵa qalaı ótinish berýge bolatynyn surady.

— Eger aıaldamalar arasy kem degende 400 metr bolsa, jańa aıaldama salý máselesi qarastyrylady. Jańa aıaldama jaıaý júrginshiler ótkelinen keıin tegis jerde, burylystan alys salynady. Jol qıylysynan 30 metr alshaqtyqta bolýy kerek jáne kópirdiń astynda ne ústinde bolmaýy kerek. Aıaldama salýǵa ne jóndeýge Oren Almaty portaly nemese eOtinish arqyly aýdan ákimdigine ne basqarmaǵa ótinish jiberýge bolady, — dep habarlady jol ınfraqurylymyn damytý basqarmasy.

Sondaı-aq vedomstvo «Almaty Basjospar» mekemesinde aıaldama keshenderiniń biryńǵaı dızaın-kody ázirlenip jatqanyn habarlady.

Eske salaıyq, buǵan deıin qyzmettik avtobýstardyń aıaldamaǵa toqtaýy qanshalyqty zańdy ekenin jazǵanbyz.