Almatyda jańa avtotýnnel ashyldy
Almatyda Buqtyrma kóshesiniń boıynda týnnel arqyly avtokólikter júre bastady, dep habarlaıdy QazAqparat tilshisi.
Almatyda Buqtyrma kóshesi men Qulja tas jolynyń qıylysyndaǵy jolaıyryqta, dálirek aıtqanda, Buqtyrma kóshesi boıynda 4 jolaqty avtotýnnel ashyldy.
Almaty qalalyq mobıldilik basqarmasynyń basshysy Saǵyndyq Telibaev atap ótkendeı, 2018 jyly avtokólik qozǵalysyn jaqsartý men júktemesin azaıtý maqsatynda Buqtyrma kóshesi men Qulja tas jolynyń qıylysynda jolaıryqty salý boıynsha jobalaý smetalyq jumystary bastalǵan.
"2019 jyly avtokólik jolaıryǵyn salýdy bastadyq. Jobanyń quny 22 mlrd teńgeni quraıdy. Jolaıryq negizgi úsh qurylymnan turady. Eń negizgi qurylym ol estakada. Ol eń joǵarǵy qabatta ornalasqan, alty jolaqty, uzyndyǵy 500 metrden asady. Odan keıin jer deńgeıinde aınalma jol, úshinshi deńgeıde týnnel ornalasqan. Týnnel Buqtyrma kóshesi boıynda ornalasty. Onyń maqsaty Buqtyrma kóshesi men Talǵar kúre jolyn jalǵaýǵa arnalǵan. Ol tórt jolaqty, uzyndyǵy 830 metrdi quraıdy.
Jalpy nysandy qazan aıynyń sońynda paıdalanýǵa beriledi dep josparlandy. Eger de qurylys jumystary bitken soń, qandaı da bir aqaýlar shyǵyp jatsa, olardy qurylysty júrgizgen merdigerdiń qarajaty esebinen jóneletin bolady", - dedi Saǵyndyq Telibaev.
Onyń aıtýynsha, Almatyda qazirgi ýaqytta úsh avtokólik jolaıryǵy salynyp jatyr.
"Onyń biri osy jerde ıaǵnı Buqtyrma kóshesi - Qulja tas jolynyń qıylysynda, ekinshisi Alataý aýdanynda Móńke bı - Saıyn kósheleri qıylysynda, úshinshisi Seıfýllın - Jansúgirov kósheleri qıylysynda salynyp jatyr", - dedi spıker.
Qurylys júrgizýshi merdiger kompanııanyń ókili, BAZIS CONSTRUCTION kompanııasynyń ınfraqurylym jobalar boıynsha vıtse-prezıdenti Hýram Mýradov jumystar qalalyq mobıldilik basqarmasymen jasasqan kelisimshartqa sáıkes júrir jatqanyn aıtty.
"Qurylys jumystary 2019 jyly bastalǵan. Búginge deıin aýqymdy jumystar isteldi. Atap aıtqanda, jobada 110 kýb metr monolıtti beton jumystary, kommýnıkatsııany qaıta ornalastyrý, baılanys jelilerin tartý, magıstraldy sý qubyryn salý jáne basqa da jumystar jasaldy. 8 myń tonnadan astam metall, armatýralar qoıyldy. Qarama-qarsy baǵytta, ıaǵnı, qalaǵa kiretin jáne qaladan shyǵatyn eki estakada salyndy. Ol estakadadan táýligine 50 myńnan astam kólik ótedi. Jalpy jolaıryq arqyly táýligine 60 myńnan astam kólik ótetin bolady. Sondaı-aq, estakada men týnnel tolyq jaryqtandyryldy. Odan bólek, joba boıynsha kógaldandyrý jumystary qarastyrylǵan, ıaǵnı, qazirgi tańda 60 myń sharshy metr ósimdik pen 200 ártúrli aǵashty otyrǵyzý jumystary júrip jatyr. Ol jumystar bitýge jaqyn", - dedi merdiger ókili.