Almatyda jańa avtobýs baǵyty ashyldy
ALMATY. KAZINFORM – Búginen bastap Almatyda jańa avtobýs baǵyty ashyldy.
№91 baǵyttaǵy avtobýs «Nurshashqan» shaǵyn aýdany – Almaty-2 temirjol vokzaly» baǵyty boıynsha 13 jeltoqsannan bastap qatynaıdy. Bul baǵytty «Almatyelektrotrans» JShS «Golden Dragon» markaly gazben júretin avtobýstarymen qamtamasyz etedi. Kún saıyn 12 avtobýs jolǵa shyǵady, qozǵalys aralyǵy 12 mınýt.
Almaty ákimdiginen málim etkendeı, jolaýshylar men júkti avtokólikpen tasymaldaý erejesine sáıkes, marshrýt ýaqytsha baıqaý ótkizilgenge deıin tasymaldaýshyǵa berildi jáne synaq rejımde jumys isteıdi. Jolaýshylar legi men halyqtyń qajettiligin eskere otyryp, qozǵalys syzbasyna túzetýler engizilýi múmkin.
Esterińizge sala keteıik, bıyl qala basshysy Erbolat Dosaevtyń tapsyrmasymen ákimdik 600 avtobýs, 112 trolleıbýs jáne 100 elektroavtobýs satyp aldy.
Jyl basynan beri qalalyq mobıldilik basqarmasy 18 qala mańyndaǵy jáne 3 qala ishindegi marshrýtty uıymdastyrdy.
Budan bólek, 2025 jyly Almatyǵa elektrmen júretin 200 jáne gazben júretin 600 avtobýs satyp alý josparda.